Al-ergii omishaalee qonnaa irratti xiyyeeffannoo olaanaan ni hojjetama- Obbo Shimallis Abdiisaa

Finfinnee, Hagayya 23, 2017(FMC)- Pireezidaantiin Mootummaan Naannoo Oromiyaa obbo Shimallis Abdiisaan al-ergii omishaalee qonnaa irratti xiyyeeffannoo olaanaan ni hojjetama jedhan.

Obbo Shimallis Abdiisaan ergaa miidiyaa hawaasummaa isaaniin dabarsaniin, Mootummaan Jijjiiramaa Naannoo Oromiyaa, galmoota dinagdee naannichaa milkeessuf, jalqaba rakkolee misoomaafi al-ergii oomishaalee qonnaa adda baasuun furmaata imaammataa kaa’uu, dhimma murteessaa taasisuun eegale jedhan.

Rakkooleen al-ergii adda bahanis oomisha, qajeelfama, seeraafi bulchiinsa gaarii, gahumsa rawwachiisummaafi dhiyeessii, akkasumas dandeettii dhiyeessiifi ittiwaamama al-ergitootaa, bulchiinsa gabaafi hoj-maata dhiyeessii galteewwaniifi nyaata beeyladaa, leecalloofi bu’uuraalee misoomaa, liqii, sharafa alaa fi daldala seeraan alaa ta’uu eeran.

Rakkoolee kanneen furuuf furmaanni imaammataa qindoomaa qaamolee federaala-naannoo-sektara dhuunfaa ilaallatan dhiyaachuu yaadachiisaniiru.

Haaluma Kanaan hojiileen qoteefi horsiisee bultoota misooma oomishaalee al-ergii keessa akka galan jajjabeessuu, ijaarsa paarkiiwwan qindaa’aa indastirii qonnaa, ijaarsa daandii, buufataalee xiyyaaraafi kuusaa oomishaalee babaldhisuu, leecalloo mijeessuufi kanneen biroorratti hojjetaman bu’aa abdachiisaa argamsiisaa jiru jedhan.

Hordoffii cimaa raasifameenis qoteefi horsiisee bultoota baldhinaan gara misooma oomishaalee qonnaa al-ergiitti galchuun cinaatti, baay’ina, dhiyeessii amansiisaafi qulqullina oomishaa dhimma ijoo taasisuun akka socho’an gochuun danda’amuu eeraniiru.

Qonna kontiraataa babaldhisuun, dhiyeessiin galteefi hidhanni gabaa yaaddoo oomishtootaa akka hintaane gochuun danda’amuus kaasaniiru.

Gufuu ture maqsuun, hidhamiinsi oomishtootafi al-ergitoota gidduutti uumamu kallattiin akka ta’u milkeessuu irratti argamna jedhaniiru.

Kana malees rakkoo dhiyeessii liqii oomishaafi al-ergii ture daran fooyya’uun hubachiisaniiru.

Hojii baldhaa dhaqqabummaa gabaa irratti raawwachaa jirruun, qoteefi horsiisee bultoota dabalatee, oomishtoonni dhuunfaafi waldaan gabaa idil-addunyaa keessa akka galan humneessuun danda’amuus ibsaniiru.

Mootummaan Jijjiiramaa Naannoo keenyaa, yeroo ittaanus, al-ergii oomishaalee qonnaa irratti xiyyeeffannoo olaanaan kan socho’u ta’a jedhaniiru.

#Oromia #Ethiopia

Odeeffannoowwan waqtaawaa dabalataa argachuuf;

Teelegiraama t.me/afanoromofana

Yuutiyuubii Afaan Oromo: www.youtube.com/@fmcafaanoromoo

Marsariitii www.fanamc.com/afaanoromoo

Tiwiitara https://twitter.com/fanatelevision

Feesbuukii: FMC Afaan Oromoo

Tiktok https://www.tiktok.com/@fana_afaan_oromoo

Yeroo maraa nu waliin waan taataniif isin galateeffanna.