Biqiloota waggoottan jahan darban dhaabaman keessaa % 84.5 ol lataniiru – Biiroo Qonnaa

Finfinnee, Onkoloolessa 6, 2018 (FMC) – Hojii kunuunsa qabeenya uumamaa waggoottan darban hojjatamaniin uwwisni bosona naannichaa % 17 irra ture gara % 29’tti ol guddateera jedhe Biiroon Qonna Oromiyaa.

Hoogganaa Itti Aanaan Biiroo Qonnaa Oromiyaa Obbo Eeliyaas Kadir, Mootummaan Naannoo Oromiyaa gaaga’ama jijjiirama qilleensaa furuun jiruufi jireenya qonnaan bultoota naannichaa fooyyessuuf inisheetiiviiwwan bocaman keessaa hojiin qabeenya uumamaa kunuunsuu isa tokko ta’uu ibsaniiru.

Hojii gama kanaan xiyyeeffannoon hojii hojjatamaa tureen bu’aawwan hedduun argamuus dubbataniiru.

Naannoo Oromiyaatti waggoottan jahan darban biqiltuuwwan gosa adda addaa biliyoona 27.8 dhaabamuun kunuunfamaa kan jiran ta’uus eeranii, kanneen keessaa %84.5 lateera jedhan.

kanaanis uwwisni bosona naannichaa %17 irra ture gara %29tti ol guddachuu himan.

Kanaanis bosona misoome irraas hawaasni naanichaa fayyadamaa ta’uu kaasan.

Hojiilee eegumsaafi kunuunsa qabeenya uumamaa hojjatamaa turaniin maddeen bishaanii, laggeeniifi haroowwan goganii turan bakkatti deebi’uu akka fakkeenyaatti eeran.

Dargaggoota hedduufis carraan hojii uumamuu kaasanii, dargaggooti hedduun waldaa gurmaa’uun misooma dammaa, furdisa looniifi horii aannanii irratti hojjetanii of jijjiiraa jiru jedhan.

Bu’aalee argaman kanneen babal’isuuf bara 2018 kanatti biqiltuuwwan gosa adda addaa biliyoona 5.5 dhaabuuf karoorfamee hojjetamaa jiraachuu himanii, hojiin sanyii qopheessuun raabsuu fi buufataalee biqilaa qopheessuu hojjetamaa jiraachuu himaniiru.

Hojii kunuunsa qabeenya uumamaaf ijoo kan ta’e hojii eegumsa biyyoofi bishaanii bara kanaan lafa hektaarri miliyoona 3.2 irratti duula guyyaa 60n hojjatamu baatii Amajjii irraa kaasee kan labsamu ta’uu ibsaniiru.

Hojii kanaanis lafti hektaarri miliyoona3.2 kan misoomuufi qaamoleen hawaasa garaa garaa miliyoona 9.9 kan hirmaatan ta’uus dubbachuu isaanii ragaan Biiroo Kominikeeshinii Naannoo Oromiyaa irraa arganne ni mul’isa.

#Oromia #Ethiopia

Odeeffannoowwan waqtaawaa dabalataa argachuuf;

Teelegiraama t.me/afanoromofana

Yuutiyuubii Afaan Oromo: www.youtube.com/@fmcafaanoromoo

Marsariitii www.fanamc.com/afaanoromoo

Tiwiitara https://twitter.com/fanatelevision

Feesbuukii: FMC Afaan Oromoo

Tiktok https://www.tiktok.com/@fana_afaan_oromoo

Yeroo maraa nu waliin waan taataniif isin galateeffanna.