Buufanni Xiyyaaraa Yaaballoo eebbisiifame
Finfinnee, Hagayya 25, 2017(FMC) – Buufanni Xiyyaaraa Yaaballoo bakka Ministira Muummee Itti aanaa obbo Tamsageen Xurunaafi hoggantoonni mootummaa olaanoon argamanitti eebbisiifameera.
Sagantaa kanarratti Walitti Qabaa Boordii Daandii Qilleensaa Itiyoophiyaa Leetenaant Jeneraal Yilmaa Mardaasaa, Pireezidaantii Mootummaa Naannoo Oromiyaa obbo Shimallis Abdiisaafi Hojii Raawwachiisaa Olaanaa Daandii Qilleensaa Itiyoophiyaa Masfin Xaasaw dabalatee hoggantoonni mootummaa olaanoon biroon argamaniiru.
Buufanni Xiyyaaraa kun baasii Birrii biliyoona tokkoon kan ijaarame yoo ta’u, torbanitti tajaajila balallii guyyoota sadii akka kennu ibsameera.
Bakkeewwan balallii biyya keessaa gara 22’tti kan guddisu ta’uus eerameera.
Ministirri Muummee Itti aanaan obbo Tamasgeen Xurunaan sagantaa kanarratti akka jedhanitti, mootummaan hojiilee misoomaa guddina biyyaa saffisiisan hojjechuurratti argama.
Buufanni Xiyyaaraa Yaaballoos kanneen keessaa tokko ta’uu dubbatan.
Booranni aadaafi duudhaa Gadaa eeguun addunyaaf kan gumaache waan ta’eef buufanni xiyyaaraa kunis kan isa barbaachisu ta’uu ibsaniiru.
Booranni aadaa eeguu qofa osoo hin taane daangaa biyyaa eeguunis gumaacha olaanaa kan qabudha jedhan.
Godinichatti hongee irra deddeebiin mudatu qolachuuf hojii boonsaan hojjetamaa turuus yaadachiisaniiru.
Buufanni Xiyyaaraa Yaaballoo ijaaramuun misoomni, investimentii fi tuurizimiin caalmaatti akka babal’atu taasisa waan ta’eef qabeenya kana tifkadhaa itti fayyadamaa jechuun dhaamaniiru.
Pireezidaantiin Mootummaa Naannoo Oromiyaa obbo Shimallis Abdiisaan gamasaaniin, adeemsa konkolaataan sa’aatii 10 fudhatu ijaaramuu daandii qilleensaa kanaan gara sa’aatii tokkootti gadi buusuun bu’aa qabeessummaan isaa olaanaa ta’uu ibsan.
Baahiluu Baaneetu Gabaase.
#Oromia #Ethiopia
Odeeffannoowwan waqtaawaa dabalataa argachuuf;
Teelegiraama t.me/afanoromofana
Yuutiyuubii Afaan Oromo: www.youtube.com/@fmcafaanoromoo
Marsariitii www.fanamc.com/afaanoromoo
Tiwiitara https://twitter.com/fanatelevision
Feesbuukii: FMC Afaan Oromoo
Tiktok https://www.tiktok.com/@fana_afaan_oromoo
Yeroo maraa nu waliin waan taataniif isin galateeffanna.