Fooyyessichi daldala Qinxaaboo babal’isuu fi abbootii qabeenyaa hawwachuuf carraa uume – Obbo Ahimad Shiidee

Finfinnee, Amajjii 6, 2018 (FMC) – Fooyyessi Diinagdee Gooroo daldala Qinxaaboo babal’isuu fi abbootii qabeenyaa alaa hawwachuuf carraa uume jedhan Ministirri Ministeera Maallaqaa Obbo Ahimad Shiideen.

Miidrook Invastimanti Giruuppii jalatti kan argamu Suuppar Maarkettiin Kuwiinsi moggaasa daldalaa isaa hojmaata guutuu qooduu fi waliigaltee tumsa dhiyeessii Dhaabbata Daldala Qinxaaboo Idil Addunyaa Kaarifoorii waliin mallatteesseera.

Fooyyessi Diinagdee Gooroo Itiyoophiyaan hojiirra oolchite bu’aa qabatamaa galmeessaa jiraachuu ibsan saganticharratti kan argaman Ministirri Ministeera Maallaqaa obbo Ahimad Shideen.

Fooyyessichi Daldala Qinxaaboo gabaa alaaf banaa taasisuu himuun, kana hordofee dhaabbileen alaa gara Itiyoophiyaa dhufaa jiru jedhan.

Itiyoophiyaatti hojmaanni Daldala Qinxaaboo ammayyeessuuf dandeessisu diriiruu dubbachuun, kanaafis Dhaabbanni Kaarifoorii Faransaay agarsiiftuu ta’uu eeran.

Waliigalteen dhaabbileen lamaan taasisan oomishaalee Itiyoophiyaa gabaa addunyaarratti beeksisuuf carraa kan banu ta’uu ibsan.

Akkaataa waliigaltichaan dameewwan kuusaa Kuwiinsi 13 gara Biraandii Kaarifooriitti kan jijjiirraman yoo ta’u, kunis walakkeessa bara Faranjootaa 2026 hojiirra oola jedhame.

Giruuppiin Kaarifoorii biyyoota 40 keessatti Kuusaa kan qabu yoo ta’u, akka addunyaatti kuusaawwan kuma 15 ol qaba.

Bara Faranjootaa 2024 galii Yuuroo biiliyoona 94.6 kan galmeesse dhaabbata jabaadha.

#Oromia #Ethiopia

Odeeffannoowwan waqtaawaa dabalataa argachuuf;

Teelegiraama t.me/afanoromofana

Yuutiyuubii Afaan Oromo: www.youtube.com/@fmcafaanoromoo

Marsariitii www.fanamc.com/afaanoromoo

Tiwiitara https://twitter.com/fanatelevision

Feesbuukii: FMC Afaan Oromoo

Tiktok https://www.tiktok.com/@fana_afaan_oromoo

Yeroo maraa nu waliin waan taataniif isin galateeffanna.