Itiyoophiyaa fi Paakistaan tumsa damee Humna Qilleensaan qaban cimsuuf waliigalan

Finfinnee, Hagayya 22, 2017 (FMC) – Itiyoophiyaa fi Paakistaan hariiroo gamlamee damee Humna Qilleensaan qaban caalmaatti cimsuuf waliigalaniiru.

Ajajaa Olaanaan Humna Qilleensaa Itiyoophiyaa Letenaal Jeneraal Yilmaa Mardaasaan Ajajaa Olaanaa Humna Qilleensaa Paakistaan Eer Chiif Maarshaal Zaahiir Ahimad Baabar Siiduu waliin mari’ataniiru.

Marii isaaniin tumsa gamlamee damee humna qilleensaan biyyoota lameen giddu jiru caalmaatti cimsuuf murannoo waloon qaban mirkaneessaniiru.

Letenaal Jeneraal Yilmaa Mardaasaan, Itiyoophiyaa jijjiirama hundagaleessarratti kan argamtu ta’uu ibsuun, jijjiiramni kun Diinagdee fi Siyaasaan qofa osoo hin taane Raayyaa Ittisa biyyaa ammayyeessuun xiyyeeffannoon kennamuu hubachiisaniiru.

Letenaal Jeneraal Yilmaan qophaa’ummaa, guddinaa fi dandeettii amansiisaa Humni Qilleensaa Paakistaan qabu dinqisifataniiru.

Ajajaan Humna Qilleensaa Paakistaan gamasaaniin, daawwannaan Jeneraal Yilmaan Paakistaanitti taasisan hariiroo biyyoonni laman qaban guddachaa dhufuu agarsiisa jedhan.

Paakistaan hariiroo Itiyoophiyaa wajjiin qabduuf gatii guddaa qabaachuus ibsaniiru.

Paakistaanitti Ambaasaaddarri Itiyoophiyaa Dooktar Ambaasaaddar Jamaal Bakar, daawwannaan kun humnoota qilleensaa biyyoota Michuu gidduu tumsa tarsimawaaf bu’uura kan kaa’uudha jedhan.

#Oromia #Ethiopia

Odeeffannoowwan waqtaawaa dabalataa argachuuf;

Teelegiraama t.me/afanoromofana

Yuutiyuubii Afaan Oromo: www.youtube.com/@fmcafaanoromoo

Marsariitii www.fanamc.com/afaanoromoo

Tiwiitara https://twitter.com/fanatelevision

Feesbuukii: FMC Afaan Oromoo

Tiktok https://www.tiktok.com/@fana_afaan_oromoo

Yeroo maraa nu waliin waan taataniif isin galateeffanna.