Kitaabni Seenaa Daani’eel Dabalaa Boru Eebbifama
Finfinnee, Hagayya 24, 2017 (FMC)- Yeroo Barnoonni ammayyaa hinbaratamnetti barnoota ammayyaa Sirna barnootaa qabu jalqabsiisuun nama jalqabaati kan jedhaman Kitaabni seenaa Daani’eel Dabalaarraatti xiyyeeffachuun barreeffame Boru Eebbifama.
Barreessaa kitaabichaa keessaa tokko kan ta’an Lubni Fiqaaduu Beenyaa waa’ee kitaabichaa fi qabiyyee isaa irratti Poodkaastii Faanaa waliin turtii taasisaniin, Daani’eel Dabalaa barnoota ammayyaa jalqabuun nama seenaa barnoota ammayyaa biyyattii keessatti dhagaa bu’uuraa kaa’aniidha jechuun ibsan.
Bara 1898 keessa barnoota ammaayyaa kan sirna barnootaa qabu, qubee barsiisuu, ogummaa harkaa, qulqullina, nyaata qopheessuu fa’aan kan eegalan ta’uu kaasan.
Dabalataan waa’ee isaa argannoo qorannoo hayyoonni gaggeessan tokko tokko akka mul’isutti yeroo Oneesmoos Nasiib fa’aa Kitaaba Qulqulluu hiikaa turanitti Daani’eel Dabalaa gulaalaa Kitaabichaa akka turan eeran.
Kitaabni barreeffame kun seenaa namoota har’aaf bu’uura ta’an Daani’eel Dabalaa dabalatee Waraana Koongoo fi Kooriyaarratti hirmaachuun gootummaan kan eeramtu Seenaa Asteer Ayyaanaa of keessaa akka qabullee kaasaniiru.
Kitaabni kunis Afaanota sadiin: Afaan oromoo, Afaan Amaaraa fi Ingiliffaan kan barreeffame ta’uu kan kaasan Lubni Fiqaaduu Beenyaan, maallaqni gurgurtaa kitaabichaarra argamu Maqaa Abbaa seenichaa Daani’eel Dabalatiin dhaabbataa tokko hundeessuuf kan oolu ta’uu dubbataniiru.
Eebbi Kitaaba Seenaa Daani’eel Dabalaa kunis Dilbata borii Hagayya 25, 2017 Finfinnee Galma Yaadannoo Adwaatti kan eebbifamu ta’uu ibsan.
Odeeffannoowwan waqtaawaa dabalataa argachuuf;
Teelegiraama t.me/afanoromofana
Yuutiyuubii Afaan Oromo: www.youtube.com/@fmcafaanoromoo
Marsariitii www.fanamc.com/afaanoromoo
Tiwiitara https://twitter.com/fanatelevision
Feesbuukii: FMC Afaan Oromoo
Yeroo maraa nu waliin waan taataniif isin galateeffanna.