Magaalaan Bishooftuu giddugala  Tuurizimii Afrikaa akka taatuuf hojjetamaa jira – Magaalicha

Finfinnee, Caamsaa 7, 2017 (FMC) – Magaalaan Bishooftuu sadarkaa biyyaa fi  Afrikaatti giddugala tuurizimii akka taatuuf  mul’ata qabame dhugoomsuuf pirojeektiiwwan garaagaraa karoorfamanii hojjetamaa jiraachuu komiishiniin tuurizimii Magaalichaa obbo Dajanee  Bajiroo ibsan.

Qabeenyi tuurizimii uumamaa, kan aadaa, kan namtolchee fi kan magaalaa isheen  qabdu magaalaa naga qabeettii giddugala  tuurizimii taatee akka filatamtuuf kan gargaaran ta’uus dubbataniiru.

Haroowwan uumamaa torbanii fi tulluuwwan ta’iiwwan adda addaa keessummeessan kanneen akka  Cuqqaalaa fi Erer  qabeenya uumamaa kanneen keessaa akka fakkeenyaatti kan eeramanii dha jedhan.

Wiirtuun haroowwan uumamaa  torbaa,  faayyeffamtuun tulluuwan ,  magaalaan  Bishooftuu, carraawwan uumamaan qabdu kanaan cinattis konfiransiiwwanii fi ta’iiwwan aadaa bakka itti geggeeffaman ta’uun ishees gama kanaan xiyyeeffannaa  akka argattuuf gargaareera.

Irreechi Harsadee, Galmi Gadaa Tuulamaa, Odaan Nabee magaalattiitti argaman qabeenyawwan aadaa tuurizimii hawwatan keesaa isaan ijoo dha.

Riizortiiwwanii fi hoteelonni idil addunyaa ijaaramanii fi ijaaramaa jiran guddina tuurizimii magaalattiif qooda guddaa bahaa jiru.

Mul’ata akka waliigalaatti qabame sadarkaa olaanaan dhugoomsuufis  wiirtuu agarsiisa xiyyaaraa akka taatuuf hojjetamaa kan jiru yoo ta’u dirreen xiyyaaraa haaraan naannoo  magaalattiitti hojjetamuuf jirus kanaaf agarsiistuu dha jedhaniiru.

Misoomni koriidaraii magaalattii hojjetamaa jirus hawwattumaa gama tuurizimiin qabdu caalamaatti guddisuuf kan gargaare ta’uu obbo Dajaneen ibsaniiru.

Tumsi abbootiin qabeenyaa dhuunfaa fi uummata magaalattiis adeemsa mul’ata kana dhugoomsuuf deemamaa jiru keessatti qooda guddaa ba’aa akka jiru obbo Dajaneen itti dabaluun hubachiisaniiru.

Yoonaataan Biraanuutiin.