በአፋር ክልል የእሳተ ገሞራ ፍንዳታ በተከሰተበት አካባቢ አንጻራዊ መረጋጋት ተፈጥሯል – ኢንስቲትዩቱ

አዲስ አበባ፣ ሕዳር 20፣ 2018 (ኤፍ ኤም ሲ) በአፋር ክልል ከቀናት በፊት የእሳተ ገሞራ ፍንዳታ በተከሰተበት አካባቢ ማህበረሰቡ ተረጋግቶ ስራውን መከወን የሚችልበት አንጻራዊ መረጋጋት ተፈጥሯል አለ የኢትዮጵያ ጂኦሎጂካል ኢንስቲትዩት፡፡

ኢንስቲትዩቱ በክልሉ ኤርታሌ አካባቢ ልዩ ስሙ ሃይሊ ጉብ በተባለ ስፍራ የተከሰተውን የእሳተ ገሞራ ፍንዳታ አስመልክቶ ለፋና ዲጂታል በላከው መግለጫ፥ በአሁኑ ሰዓት በአካባቢው ያለው ሁኔታ በአንጻራዊነት የተረጋጋ መሆኑን አመልክቷል፡፡

የኢትዮጵያ ጂኦሎጂካል ኢንስቲትዩት ዋና ዳይሬክተር አቶ ኢጃራ ተስፋዬ እንዳሉት፥ ተቋሙ ካለፈው ሀምሌ ወር ጀምሮ የተለያዩ ለእሳተ ገሞራ ፍንዳታ አመላካች ሁኔታዎችን በቅርበት የመከታተል፣ መረጃዎችን የማሰባሰብና የመስጠት ስራ ሲሰራ ቆይቷል፡፡

ባሳለፍነው እሑድ ሕዳር 14/2018 ዓ.ም የተከሰተው የእሳተ ገሞራ ፍንዳታ ያለበትን ሁኔታ የሚመለከትና የሚያጠና የጥናት ቡድን ተቋቁሞ በስፍራው ጥናት እያደረገ እንደሚገኝ ገልጸዋል፡፡

አሁን በቦታው ላይ ያለው ሁኔታ በአንጻራዊነት የተረጋጋ መሆኑን ጠቅሰው፥ ማህበረሰቡ ተረጋግቶ ስራውን እንዲያከናውን ጥሪ አቅርበዋል፡፡

በሀገር ውስጥና ከሃገር ውጭ ካሉ ተቋማትና ተመራማሪዎች ጋር በጋራ እየተከናወነ ያለው የምርምር ስራ ሲጠናቀቅ ተጨማሪ መግለጫ እንደሚሰጥም ጠቁመዋል፡፡