የኢትዮጵያ የቱሪዝም ትንሣዔ…

መንግሥት የቱሪዝሙን ዘርፍ አንዱ የሀገር በቀል ኢኮኖሚ ማሻሻያ ምሰሶ አድርጎ ይዞታል፡፡

ከዚህ ቀደም ተዘንግተው የነበሩ የተፈጥሮና የታሪክ ሀብቶች የሀገሪቱ የገቢ ምንጭ እንዲሆኑ በርካታ ታላላቅ ሥራዎችን አከናውኗል።

የመንግሥት የቱሪዝም ልማት ስትራቴጂ በተለይ በሜጋ ፕሮጀክቶች ግንባታ፣ በከተሞች ገጽታ ሽግግር እና በመሠረተ ልማት ማዘመን ላይ ከፍተኛ እመርታ አስመዝግቧል፡፡

ሀ. የገበታ ፕሮጀክቶችና የአምባሳደር መዳረሻዎች ግንባታ:-

መንግሥት የሀገሪቱን የቱሪስት መስህቦች ብዛትና ጥራት ለማሳደግ በጠቅላይ ሚኒስትር ዐቢይ አሕመድ(ዶ/ር) አነሳሽነት ሦስት ተከታታይ ታላላቅ የልማት ፕሮጀክቶችን ቀርፆ ወደ ሥራ አስገብቷል፡፡

• ገበታ ለሸገር ፦ አዲስ አበባ ከተማን የቱሪስት ማረፊያ ለማድረግ በርካታ ፓርኮች ተገንብተዋል። በአንድነት ፓርክ የታላቁ ቤተ መንግሥት ቅጥር ግቢን ለሕዝብ ክፍት በማድረግ፣ የእንጦጦ ፓርክን ከተፈጥሮ ጋር ወደ ተስማማ የመዝናኛ ስፍራነት በመቀየር፣ የሳይንስ ሙዚየም እና የወዳጅነት ፓርክን ለኮንፍረንስና ለመዝናኛ ቱሪዝም እንዲውሉ በማድረግ ተገንብተው አገልግሎት እንዲሰጡ ተደርጓል፡፡

• ገበታ ለሀገር፦ የሀገሪቱን እምቅ የተፈጥሮ ሀብት ለመጠቀም ሜጋ ፕሮጀክቶች ተገንብተዋል። እነሱም የወንጪ-ደጪ ኢኮ-ቱሪዝም ፣ የጎርጎራ መዝናኛ መዳረሻ እና የኮይሻ ቱሪስት መዳረሻ ናቸው።

• ገበታ ለትውልድ፦ በሁለተኛው ምዕራፍ በተለያዩ የሀገሪቱ ክፍሎች (ለምሳሌ እንደ ባቢሌ የአንበሶች መጠለያ፣ አባ ሳሙኤልና ሌሎች ስፍራዎች) አዳዲስ የቱሪስት መዳረሻዎች በመገንባት ላይ ይገኛሉ።

ለ. የከተሞች የኮሪደር ልማትና የገጽታ ሽግግር:-

የኮሪደር ልማት በአዲስ አበባ እና በሌሎች ከተሞች በመተግበሩ የከተሞችን ገጽታ፣ ለነዋሪዎች ያለውን ምቹነት እና የቱሪዝም መሠረተ ልማቱን ሙሉ በሙሉ ቀይሮታል።

• ለቱሪስቶች ምቹ የሆኑ ሰፋፊና ንፁህ የእግር ጉዞ መንገዶች እና የብስክሌት መስመሮች ተገንብተዋል።

• ታሪካዊ ቅርሶችና ጥንታዊ ሕንጻዎች ሳይፈርሱ ተጠብቀው እንዲታደሱና እንዲዋቡ ተደርገዋል።

• አረንጓዴ ስፍራዎች፣ የውሃ ፏፏቴዎች እና ዘመናዊ የጎዳና ላይ መብራቶች በመገንባታቸው የከተማዋን ገጽታና ቱሪዝም አነቃቅተዋል።

ሐ. የታሪክና የባህል ቅርሶችን ማደስና መጠበቅ:-

መንግሥት የዓለም ቅርስ የሆኑትንና የሀገሪቱን አንጋፋ የቱሪስት መስህቦች የመንከባከብ ሥራዎችን አከናውኗል፦

• የላሊበላ ውቅር አብያተ ክርስቲያናት፦ በቅርስ ጥገና ዘላቂ ጥበቃ እንዲያገኙ ተደርጓል።

• የፋሲለደስ ግንብ እና የጀጎል ግንብ ፦ ጥንታዊ ይዘታቸውን ሳይለቁ የዕድሳትና የውበት ሥራዎች ተሰርቶላቸዋል።

• ዓድዋ ድል መታሰቢያ፦ በአዲስ አበባ እምብርት ላይ የተገነባው ታላቁ የዓአድዋ ድል መታሰቢያ የጥቁር ሕዝቦችን ኩራትና የታሪክ ቱሪዝምን ለማሳደግ ትልቅ ሚና እየተጫወተ ይገኛል።

መ. የፖሊሲ፣ የዲጂታላይዜሽንና የቪዛ ማሻሻያዎች:-

መንግሥት አሠራሮችን በማዘመን የቱሪስቶችን ፍሰት ቀላል ለማድረግ ሰፋፊ ሥራዎችን ሰርቷል፡፡

• የኢ-ቪዛ ሥርዓት፦ የውጭ ሀገር ጎብኚዎች ባሉበት ሆነው በኢንተርኔት ቪዛቸውን በቀላሉ እንዲያገኙ ተደርጓል።

• የትራንዚት ቱሪዝም፦ በቦሌ ዓለም አቀፍ አውሮፕላን ማረፊያ በኩል የሚያልፉ መንገደኞች አውሮፕላን እስኪቀይሩ ድረስ አዲስ አበባን እንዲጎበኙ ምቹ ሁኔታዎች ተፈጥረዋል።

• የኢትዮጵያ የቱሪዝም ትንሣዔ፦ የሀገሪቱን የቱሪዝም ብራንድ በዓለም አቀፍ ደረጃ የማስተዋወቅና የማርኬቲንግ ሥራዎች በስፋት ተከናውነዋል።