Eksipoon Teeknooloojii Itiyoophiyaa dandeettii biyyattiin damee teeknooloojiin qabdu agarsiisa- Aadde Adaanech Abeebee

Finfinnee, Caamsaa 10, 2017 (FMC) – Eksipoon Teeknooloojii Itiyoophiyaa dandeettii biyyattiin damee teeknooloojiin qabduufi xiyyeeffannoo damichaaf kennite kan agarsiisu ta’uu Kantiibaan magaalaa Finfinnee Aadde Adaanech Abeebeen ibsan.

Aadde Adaanech Abeebeen Eksipoo Teeknooloojii Itiyoophiyaa ( ETEX 2025) Giddugala Konveenshinii Idil-addunyaa Addisitti gaggeeffamaa jiru daawwataniiru.

Eksipoon kun dandeettii Itiyoophiyaan Artifishaal Intelejensiin, nageenya saayibariin, Fiin-teek fi dameewwan teeknooloojii biroon qabdu kan agarsiisuu ta’uus eeraniiru.

Dandeettiin magaalaan Finfinnee konfiransiiwwan idil-addunyaafi ardii qopheessuu ishee dabalaa dhufuus kaasaniiru.

Kunis galii magaalichaa guddisuurra darbee bakka gahumsaa konfiransiifi tuurizimii ishee guddisuufi jiraattotaaf carraa hojii uumuu ibsaniiru.

Feevan Bishaawutu gabaase.