𝐓𝐈𝐑𝐀𝐍𝐀𝐀𝐑𝐑𝐀𝐀 𝗚𝗮𝗿𝗮 𝐔𝐓𝐀𝐀𝐋𝐂𝐇𝐎𝐎𝐓𝐓𝐈: 𝗖𝗮𝗿𝗿𝗮𝗮𝗹𝗲𝗲𝗳𝗶 𝗛𝘂𝗱𝗵𝗮𝗮𝗹𝗲𝗲 𝗜𝗺𝗮𝗹𝗮 𝐁𝐀𝐃𝐇𝐀𝐀𝐃𝐇𝐈𝐍𝐀𝐀

Kutaa tokkoffaa keessatti, ‘Cabiinsa Sirnaa’ barootaaf nulaamshesseefi madda isaa gadifageenyaan xiinxalleerra. Kutaa lammataa keessatti ‘Kalaqaafi Ariitii’ imala ‘utaalchoo’ (Leapfrogging) jalqabuuf oolan lafa kaa’uun keenya niyaadatama.
Imalli keenya kan eegalame hiyyummaa suphuuf osoo hintaane, hudhaalee caasawaa hiyyummaa kana uuman bittineessuun sirna badhaadhina hundagaleessa mirkaneessu ijaarudha. Imala kana milkeessuuf meessaa (assets) gahaa ofharkaa qabna. Haata’uutii meessaa kanatti dhimma bahuuf kiyyoowwan amalaafi ilaalchaa (behavioral and mental chains) barootaaf hidhee nuqabe keessaa cirree bahuun waraana yaadamaafi gochaatiin mo’annee bahuu gaafata.

Mootummaa Ida’amuu lafa qabsiisuun, fedhii qofaan hindhagoomu. Jalqaba, carraalee ofharkaa qabnu gadifageenyan hubachuu barbaada; lammata ammoo, gufuulee amalaafi naamusa hoggansaa dhuunfatan adda baasanii mo’achuu gaafata.
1. 𝐇𝐮𝐦𝐧𝐚 𝐆𝐨𝐦𝐛𝐢𝐬𝐚𝐚: 𝐂𝐚𝐫𝐫𝐚𝐚𝐥𝐞𝐞 𝐎𝐟𝐡𝐚𝐫𝐤𝐚𝐚 𝐐𝐚𝐛𝐧𝐮
Mootummaa Ida’amuu lafa qabsiisuufi amala inni barbaadu horannee socho’uuf, ka’umsa barbaachisu hunda ofharkaa qabna. Isaanis:

A. 𝐘𝐚𝐚𝐝𝐚𝐦𝐚 𝐈𝐝𝐚’𝐚𝐦𝐮𝐮: 𝐁𝐢𝐫𝐦𝐚𝐝𝐮𝐦𝐦𝐚𝐚 𝐘𝐚𝐚𝐝𝐚𝐚 𝐃𝐡𝐮𝐠𝐨𝐨𝐦𝐬𝐮𝐮
Biyyi keenya waggoota dheeraaf dimimmisa hubannoofi cabiinsa sirna beekumsaa keessa turte. Addatti ammoo, gidduugala morkii yaadamoota/ilaanyaa ergifataa turte. Yaadamoonni Bahaafi Lixaa irraa ergifataman, umama hawaasummaa, dinagdeefi seenaa keenyaa waliin kan quba wal hinqabne turan. Gama kanaan Yaadamni Ida’amuu seenaa biyya keenyaa keessatti daandii haaraa (breakthrough)’dha. Yaadama ergisaa dhaloonni irratti walwaraanaa ture sanaa miti. Yaadama ‘Yabbuu’fi ‘Xabboo’ rakkoolee keenyaa hubatee, akkasumas furmaata isaanii guutummaan kaa’edha. Yaadama ofii qabaachuun ammoo, birmadummaa yaadaa (intellectual sovereignty) dhugoomsuu qofa osoo hintaane, rakkoo mataa keenyaa beekumsa keenyaan hiikuuf humna nutti uuma.

B. 𝐏𝐚𝐚𝐫𝐭𝐢𝐢 𝐁𝐚𝐝𝐡𝐚𝐚𝐝𝐡𝐢𝐧𝐧𝐚𝐚: 𝗚𝗮𝗮𝗱𝗱𝗶𝘀𝗮 𝐈𝐝𝐚’𝐚𝐦𝘂𝘂𝐟𝐢 𝐓𝐨𝐤𝐤𝐮𝐦𝐦𝐚𝐚

Paartii hammataafi bu’uura tokkummaa hunda keenyaa ta’e ofharkaa qabna. Paartii waldhiibuufi walharkisuu ture hambisee, Itiyoophiyaanota hunda hirmaachisee, abjuu, kaayyoofi galma tokkoof waloon qabsaa’uuf nudandeessisu qabna. Biyya hangafoonni sabootaa (national elites) abjuu daran walfaallessoo tarkaanfachiisaa turan keessatti; biyya dhalattoonni saba tokkoollee ajandaa waloo tokkummaan dhaabbataniif hinqabne keessatti, haala kanaan kan waliin nuhiriirsisedha.
Kuni humna guddaa armaan dura argamee hinbeekne ta’uu hubatamuu qaba. Paartiin keenya kutannoo siyaasaa hammattummaaf qabuun, qaamolee adeemsa seenaatiin jiilanii duubatti ofdhiibaa turan amansiisee gara galma walootti makaa jira.
C. 𝐘𝐚𝐚𝐝𝐚𝐦𝐚 𝐑𝐚𝐚𝐰𝐰𝐢𝐢𝐧 𝐐𝐨𝐫𝐚𝐦𝐞𝐞 𝐀𝐤𝐤𝐚 𝐇𝐨𝐣𝐣𝐞𝐭𝐮 𝐌𝐢𝐫𝐤𝐚𝐧𝐚𝐚’𝐞

Bu’aalee abdachiisoon sochii waggoota darban taasifneen galmaa’an, Yaadama Ida’amuu daandii jijjiiramaa sirrii ta’uu mirkaneessaniiru. Har’a yaadamni ida’amuu qonna, magaalomsuu, indastirii, turizimiifi dinagdee dijitaalaa niceesisa jennee akka abjuutti qofa hinhaasofnu; sochii muraasa taasisneen akka ceesisu qabatamaan mirkanaa’era. Gama siyaas-dinagdee, hawaasummaa, ijaarsa jaarmiyaaleefi kkf jijjiiramoota argineerra. Yaadamni kun qabatamaan ilaalamee qormaata yeroo (test of time) darbeera. Naamusa olaanaan raawwatamnaan, cabiinsawwan sirnaa numuudatan guutummmaatti fayyisuun badhaadhina hundagaleessa dhugoomsuu akka dandeenyu ragaa lafarratti muldhatu qabna.

D. 𝐃𝐢𝐥𝐛𝐢𝐢 𝐐𝐚𝐛𝐞𝐞𝐧𝐲𝐚𝐚: 𝐌𝐚𝐝𝐝𝐚 𝐆𝐮𝐝𝐝𝐢𝐧𝐚 𝐇𝐮𝐧𝐝𝐚𝐠𝐚𝐥𝐞𝐞𝐬𝐬𝐚𝐚

Ummata baldhaa rakkoolee dhuma keenya waliin nudeeggaruufi jijjiiramaaf qophii ta’e qabna. Lafa baldhaa, biyyee gabbataa, sirnakkoo qonnaa danuu, bishaan irraaf jalaafi haala qilleensaa mijataa qabna. Albuuda gosa hedduufi baay’ina olaanaa qabu qabna. Argamni ‘ji’oopolotikaa” keenya gaariidha. Biyyoonni kanniin hunda osoo hinqabaanne, fedhii misoomaa yaadama sirriin masakame qofa qaban yemmuu jijjiiraman argaa jirra. Kanaaf, jijjiiramuu dhabuun keenya qabeenya dhabaaf osoo hintaane, yaadama tarsiima’aa dhabuurraati. Har’a lamaanuu qabaachuun keenya humna dabalataa yeroo gabaabaa keessatti ittin ceenu nuuf uuma.
E. 𝐇𝐨𝐠𝐠𝐚𝐧𝐬𝐚 𝐓𝐚𝐫𝐬𝐢𝐢𝐦𝐚’𝐚𝐚: 𝗛𝗮𝘆𝘆𝘂𝘂s 𝗥𝗮𝗮𝘄𝘄𝗮𝗰𝗵𝗶𝗶𝘀𝗮𝗮s

Hoggansa cabiinsa sirnaa (hudhaalee caasawaa) xiinxalee yaada furmaataa waliin qindeessee barreesseefi raawwii isaatiif hoggansa tarsiima’aa kennu (intellectual and operational drive) qabaachuu keenya akka waan salphaatti ilaaluu hinqabnu. Karoora ittiyaadame ykn gabaasa qindaa’aallee qopheessuun hagam akka ulfaatu hundi keenyaa nibeekna.
Looreetiin Nagaa Addunyaa, Mummee Ministiraa keenya Abiyyi Ahmad (PhD), biyya rakkooleen barootaaf tuulamaniifi haaraan yeroo yeroon umaman tasgabbii namaaf hinlaanne gaggeessaa yaadamoota, imaammataafi tarsiimoolee kana mara barreessuun isaanii waan salphaa namni baay’een raawwatu miti. Hoggansa haala addunyaa xiinxalee keessatti taphachuu danda’u qabaachuun keenya carraa guddaa dhimma ittiba’uu qabnudha.
2. 𝐇𝐮𝐝𝐡𝐚𝐚𝐥𝐞𝐞 𝐂𝐞’𝐮𝐮 𝐐𝐚𝐛𝐧𝐮 (𝐒𝐭𝐫𝐚𝐭𝐞𝐠𝐢𝐜 𝐁𝐚𝐫𝐫𝐢𝐞𝐫𝐬)

Carraalee armaan olitti tarreeffaman dabalatee kanneen biroos hagamuu yooqabaanne, gufuulee nubiraa maddan (amala hoggansaa) hambisuu yoo hindandeenye, imalli keenya ‘tirannaa’ ta’ee hafa. Hudhaaleen ce’uu qabnu kunniin:
A. 𝐐𝐢𝐱𝐚𝐚𝐧 𝐇𝐮𝐛𝐚𝐜𝐡𝐮𝐮 𝐃𝐡𝐚𝐛𝐮𝐮: 𝐃𝐡𝐮𝐤𝐤𝐮𝐛𝐚 𝗜𝗿𝗿𝗮 𝗜𝗿𝗿𝗮𝗮 𝗔𝗿𝗴𝗮𝗻𝘂𝘂

Yaadamni Ida’amuu rakkooleefi furmaatilee biyya keenyaa haala armaan dura hinbaramneen ifatti xiinxalee kaa’e. Haata’uutii hoggansa biratti qixaan hubachuu dhabuun (superficiality) nimuldhata. Kunis gadifageenyan dubbisuu, xiinxaluu, irratti mari’achuu, haala qabatamaa naannawa keenyatti madaqsuu dhabuurraa madda. Dubbisni gadifageenya hinqabne duudhaalee bu’uuraa yaadamichaa harcaasuu, dogoggoraan hubachuufi akkaataa fedhii dhuunfaatiif (aangoo, faayidaa) toluun hiikuuf nama saaxila. Hoggansi yaadama hinhubatin ammoo dhaloota geggeessuu hindanda’u.

B. 𝗛𝗮𝗺𝗺𝗮 𝐇𝐮𝐛𝐚𝘁𝗮𝗻𝗶𝗶 𝗦𝗼𝗰𝗵𝗼’𝐮𝐮 𝐃𝐡𝐚𝐛𝐮𝐮: 𝗢𝘀𝘂𝗺𝗮 𝗕𝗲𝗲𝗸𝗮𝗻 𝗕𝗮𝗹𝗹𝗲𝗲𝘀𝘀𝘂𝘂

Rakkoon gama kanaan jiru qixaan hubachuu dhabuu qofa miti. Haala mijataa jiru maratti dhimma baanee hamma hubanne raawwachuu dhabuudha. Kunis tokkoffaa humni nutarkaanfachiisu qaanqee sabboonummaa osoo hintaane ‘raawwate’ jedhamuuf (performative adherence) yemmuu ta’u muudata. Oduu yaadamichaan walqabatu ho’isaa raawwii oduu sana hinmadaalle galmeessisuun ibsama. Lammeessoo fakkeessuu (hypocrisy) irraa madda. Fakkeessitoonni wareegama ykn to’annoo yaadamichi barbaadu hawaasa irraatti yemmuu fe’an, ofii isaanii bilisa taasisu. Ittiin bulinnaafi fakkeessun fudhatama ummata biraa argamu kan kuffisu, shakkiifi burjaajii kan uumudha. Akkasumas aangoo hamilee (moral authority) keenya gaaffii keessa kan galchudha. Yaadamichi gaarii ta’us, akka tuffatamu, gatii dhabu, ummanni dhagahuuf jibbu taasisa.

C. 𝐈𝐧𝐣𝐢𝐟𝐚𝐧𝐧𝐨𝐨 𝐗𝐢𝐱𝐢𝐪𝐪𝐚𝐚𝐭𝐭𝐢 𝐐𝐮𝐮𝐟𝐮𝐮: 𝗞𝗶𝘆𝘆𝗼𝗼 𝗠𝗶𝗹𝗸𝗮𝗮’𝗶𝗻𝗮 𝗦𝗮𝗺𝘂𝗱𝗮𝗮 (𝗦𝗮𝗺𝗽𝗹𝗲)

Injifannoo xixiqqaatti quufuun qormaata lagachuuf jecha adeemsa boqonnaa haaraa uumurra dheessun ibsama. Qabeenyafi dandeettii jiruun, akkasumas gufuuwwan alaafi keessoo muudachuu malan tarreessuun raawwii eegamu xiqqeessuun ykn onnee hatuun ibsama.

Injifannoo xixiqqaa leellisuun, beela injifannoo gurguddaaf qabaachuu mallu kan nudhabsiisu ta’uu hubatamuu qaba. Guddina tirataatti quufuun, humna galmoota ceesisoo keenya kan nukeessatti ajjeesudha. Milkaa’inni ganda wayiitti galmaa’e, hanga samuda bira taree Oromiyaa guutuutti babaldhatutti jijjiiramni bu’uuraa akka hinmilkoofne qusannaa malee fudhachuu qabna.

D. 𝐀𝐝𝐞𝐞𝐦𝐬𝐚 𝐁𝐚𝐫𝐚𝐦𝐚𝐚 𝐊𝐞𝐞𝐬𝐬𝐚𝐚 𝐁𝐚𝐡𝐮𝐮 𝐃𝐡𝐚𝐛𝐮𝐮 (𝐒𝐭𝐚𝐭𝐮𝐬 𝐐𝐮𝐨)

Hanga adeemsi keenya karaa moofaarraa hinbaanetti, yaadama Mootummaa Ida’amuutiin afaan hiikkachuu qofti jijjiirama qabatamaa hindhugoomsu. Akkaataan rakkoo ittihubannu, tajaajila ittikenninu, gahee keenya ittilaallu kan yeroo darbeerraa daran yoo hinjijjiiramne bu’aan agramsiifnu hinjiraatu. Har’as warraaqsa caalaa, sochii jijjiiramaa tirataa; tarkaanfii haaraa caalaa, adeemsa baramaa milkaa’ina amansiisaa garuu ammoo muraasa argamsiisu filachuutu muldhata. Amala sirnoonni hawaasa keenya mankaraarsaa turan gadi dhaabanii deeman keessaa yoo hinbaane, hawaasicha irraa dhalachuun keenya qofti jijjiirama hinfidu. Qabsoon nu’eeggatu yoojiraate kan ofirratti gaggeessinu ta’uu qaba.

3. 𝐖𝐚𝐚𝐝𝐚𝐚 𝐒𝐞𝐞𝐧𝐚𝐚: 𝐃𝐡𝐚𝐚𝐦𝐦𝐚𝐭𝐚 𝐆𝐨𝐨𝐥𝐚𝐛𝐚𝐚

Hoggansa Mootummaa Ida’amuu ta’uuf, dhukkubbii haala barre keessaa bahuun nutti uumu damdamachuufi naamusa yaadama haaraan masakamuun barbaadu horachuun dirqama.
Ittigaafatamummaafi tarkaanfii haaraa (initiative) yaadamni kuni barbaadu fudhachuufi babaldhisuun dirqama.
Akka hoggansa Mootummaa Ida’amuuutti, ergama akka biyyaatti kenname tokko, gahee akka naannootti nugahu shallaguun osoo hintaane guutumatti ofitti fudhannee milkeessuun sochoona. Yaadamni kun lafa qabatee maraamartoon tirannaa akka cabuufi imalli utaalchoo akka iddoo qabatu, gaheen hoggansa naannoo keenyaa dachaadha.