ደብረ ብርሃን ፋና ኤፍ ኤም 94.0 የሕዝብ ጥያቄዎችን በማስመለስ ጉልህ ሚና እየተጫወተ ነው

ደብረ ብርሃን ፋና ኤፍ ኤም 94 ነጥብ 0 የተመሰረተበትን 12ኛ ዓመት ምክንያት በማድረግ ከባለድርሻ አካላት ጋር የምክክር መድረክ አካሂዷል፡፡

መርሐ ግብሩ ከመንግስት ተቋማትና መንግስታዊ ካልሆኑ ድርጅቶች ጋር በቅንጅትና በትብብር የሚሰራበትን ሁኔታ ለማጠናከር ያለመ ነው፡፡

የደብረ ብርሃን ከተማ ም/ከንቲባ ወርቃለማው ኮስትሬ በዚህ ወቅት እንዳሉት÷ጣቢያው ለአካባቢው ቀዳሚ የመረጃ ምንጭ በመሆንና ምርትና አገልግሎትን በማስተዋወቅ ረገድ ከፍተኛ አስተዋጽኦ እያበረከተ ነው፡፡

ለከተማው ሁለንተናዊ ዕድገት ላበረከተው አስተዋጽኦ አመስግነው÷ የሕዝቦችን አንድነትና ልማት ለማረጋገጥ በትብብር እንደሚሰሩ አረጋግጠዋል፡፡

በጋራ በመስራታችን ተጠቃሚ ሆነናል ያሉት የንግድ ተቋማት ባለቤቶች በበኩላቸው÷ በትብብር መስራታቸውን አጠናክረው እንደሚቀጥሉ ገልጸዋል፡፡

የጣቢያው ሥራ አስኪያጅ ዘላለም ገበየሁ ÷ ፋና ኤፍ ኤም 94 ነጥብ 0 በአካባቢው በይዘትና በሥርጭት ጥራት ተወዳጅ መሆኑን አውስተዋል፡፡

የአካባቢውን ሃብት በማስተዋወቅና የሕብረተሰብ ጥያቄዎች እንዲመለሱ በትኩረት ሲሰራ መቆየቱን አንስተው÷ በቀጣይም ተጠናክሮ ይቀጥላል ብለዋል።

በአላዩ ገረመው