በክልሉ ኢንቨስትመንትን ለመሳብ በትኩረት እየተሰራ ነው

On Nov 15, 2025 15

አዲስ አበባ፣ ሕዳር 6፣ 2018 (ኤፍ ኤም ሲ) በደቡብ ምዕራብ ኢትዮጵያ ሕዝቦች ክልል የኢንቨስትመንት አማራጮችን በማስፋት ባለሃብቶችን ለመሳብ በትኩረት እየተሰራ ነው አለ የክልሉ ንግድና ኢንቨስትመንት ቢሮ።

የቢሮው ኃላፊ አቶ ታሪኩ አካሉ ለፋና ዲጂታል እንዳሉት÷ በተያዘው በጀት ዓመት በክልሉ በተለያዩ ዘርፎች የኢንቨስትመንት ፍሰትን ለማሳደግ ትኩረት ተሰጥቶ እየተሰራ ይገኛል።

ያሉትን ሰፊ የኢንቨስትመንት አማራጮች ወደ ልማት ለማስገባት ትኩረት ተሰጥቶ እየተሰራ ይገኛል ያሉት አቶ ታሪኩ÷ ግብርናና ኢንዱስትሪን ጨምሮ በተለያዩ ዘርፎች ሰፊ የኢንቨስትመንት አመራጮች መኖሩን አስረድተዋል፡፡

በቂ አቅምና ልምድ ያላቸውን ባለሃብቶች በመመልመልና በመምረጥ በኢንቨስትመንት ዘርፍ እንዲሰማሩ ለማድረግ መሬት ግልፅ፣ ወጥ፣ ፍትሃዊና ቀልጣፋ በሆነ መንገድ እንዲተላለፍ ለማድረግ ምቹ ሁኔታዎች መፈጠራቸውን አንስተዋል።

በተጠናቀቀው የመጀመሪያ ሩብ ዓመት በግብርና ዘርፍ 386 ሚሊየን 550 ሺህ ብር ካፒታል ያስመዘገቡ 11 እንዲሁም በኢንዱስትሪ ዘርፍ 80 ሚሊየን ብር ካፒታል ያስመዘገቡ 14 ባለሃብቶች የኢንቨስትመንት ፈቃድ መውሰዳቸውን ተናግረዋል።

በክልሉ ወደ ስራ ለገቡ 69 የኢንቨስትመንት ፕሮጀክቶች ድጋፍና ክትትል እንደተደረገላቸውም ጠቅሰዋል።

ወደ ስራ ያልገቡ 21 ፕሮጀክቶች ደግሞ በአስቸኳይ ወደ ስራ እንዲሰማሩ ማስጠንቀቂያ እንደተጣቸው ጠቁመዋል፡፡

ወደ ስራ በገቡ የኢንቨስትመንት ፕሮጀክቶችም ለ615 ዜጎች ቋሚ የስራ ዕድል መፈጠሩን አመላክተዋል።

በመጀመሪያ ሩብ ዓመት በኢንቨስትመንት ላይ ለተሰማሩ ባለሃብቶች 1 ሺህ 30 ሄክታር መሬት መተላለፉን አንስተው÷ ባለሃብቶች በገቡት ውል መሰረት የወሰዱትን ቦታ እንዲያለሙ ተገቢ ክትትልና ቁጥጥር እንደሚደረግ ገልጸዋል።

በክልሉ የሚገኙ የኢንቨስትመንት አማራጮችን የማስተዋወቅ ስራዎች በትኩረት እየተሰሩ መሆናቸውን የገለጹት አቶ ታሪኩ÷ ባለሃብቶች በክልሉ ያሉትን የኢንቨስትመንት አማራጮች በመጠቀም መዋዕለ ነዋያቸውን እንዲያፈሱ ጥሪ አቅርበዋል።

በአድማሱ አራጋው

ፈጣን እና ወቅታዊ መረጃዎችን ለማግኘት፡-