የብሔሮች፣ ብሔረሰቦችና ሕዝቦች ቀን በዓል በስኬት እንዲከበር በቂ ዝግጅት ተደርጓል

On Nov 21, 2025 18

አዲስ አበባ፣ ሕዳር 12፣ 2018 (ኤፍ ኤም ሲ) 20ኛው የኢትዮጵያ ብሔሮች፣ ብሔረሰቦችና ሕዝቦች ቀን በዓል በስኬት እንዲከበር አስፈላጊው የቅድመ ዝግጅት ሥራ ተከናውኗል፡፡

20ኛው የኢትዮጵያ ብሔሮች፣ ብሔረሰቦችና ሕዝቦች ቀን በዓል በማዕከላዊ ኢትዮጵያ ክልል ሆሳዕና ከተማ ከሕዳር 25 እስከ 29 ቀን 2018 ዓ.ም ይከበራል፡፡

የበዓሉ የጸጥታና ደህንነት ዓብይ ኮሚቴ አባላት በዛሬው ዕለት ከፌዴሬሽን ምክር ቤት አፈ ጉባዔ አገኘሁ ተሻገር ጋር ተወያይተዋል፡፡

በዚህ ወቅትም በዓሉ በስኬት እንዲከበር በቂ ዝግጅት መደረጉ ተመላክቷል፡፡

አፈ ጉባዔ አገኘሁ የጸጥታና ደህንነት ዓብይ ኮሚቴ የኢትዮጵያ ብሔሮች፣ ብሔረሰቦችና ሕዝቦች ቀን በዓል በተሳካ ሁኔታ ተከብሮ እንዲጠናቀቅ ከፍተኛ አስተዋጽኦ እንዳለው አውስተዋል፡፡

በዓሉ ሕብረብሔራዊ አንድነትን በጠበቀ መልኩ እንዲከበር የሚከናወነውን አጠቃላይ ተግባር በተገቢው ሁኔታ መደገፍ እንደሚገባ አስገንዝበዋል።

ኮሚቴው እስካሁን ላከናወነው ውጤታማ የቅድመ ዝግጅት ሥራ አመስግነው÷ በዓሉ በድምቀት እንዲጠናቀቅ የጸጥታ ዘርፉ የተለመደ ትብብሩን እንዲያደርግ ጠይቀዋል፡፡

የኮሚቴው አባላት በበኩላቸው÷ በዓሉ ለኢትዮጵያ ገጽታ ግንባታ፣ ለኢኮኖሚ መነቃቃት፣ ለሕዝቦች አንድነትና ትስስር መጠናከር ሚናው ጉልህ መሆኑን አብራርተዋል፡፡

የበዓሉ አከባበር ሥነ ሥርዓት በስኬት እንዲጠናቀቅ በቂ ቅድመ ዝግጅት እንደተደረገ ማረጋገጣቸውንም የም/ቤቱ ጽ/ቤት የኮሙኒኬሽንና ሕዝብ ግንኙነት ዳይሬክተር ተረፈ በዳዳ ለፋና ዲጂታል ገልጸዋል።

ፈጣን እና ወቅታዊ መረጃዎችን ለማግኘት፡-

Amharic Podcast YouTube www.youtube.com/@fanamcpodcast በመወዳጀት ይከታተሉን፡፡

ዘወትር፦ ከእኛ ጋር ስለሆኑ እናመሰግናለን!