በጎንደር  ከተማ ተጥሎ የነበረው የሰዓት እላፊ ገደብ ተነሳ

አዲስ አበባ፣ ሕዳር 30፣ 2018 (ኤፍ ኤም ሲ) የጎንደር ከተማ አስተዳደር ፖሊስ መምሪያ በከተማዋ ተጥሎ የነበረው የሰዓት እላፊ የእንቅስቃሴ ገደብ ተነስቷል አለ፡፡

የመምሪያው አዛዥ ኮማንደር አንተነህ ቴዎድሮስ እንዳሉት÷ የከተማዋ የፀጥታ ሁኔታ በመሻሻሉ እና አስተማማኝ ሰላም በመኖሩ ነዋሪዎች የመንቀሳቀስ ነፃነታቸውን በአግባቡ  እንዲጠቀሙ ገደቡ ተነስቷል።

ህብረተሰቡ ያለምንም የፀጥታ ስጋት 24 ሰዓት መንቀሳቀስ የሚችልበት ሁኔታ ተፈጥሯል ነው ያሉት፡፡

የማታ አገልግሎት  የሚሰጡ ባለሦስት እግር ተሽከርካሪዎች (ባጃጅ) ጨምሮ ተሽከርካሪዎች 24 ሰዓት መንቀሳቀስ እንደሚችሉ ጠቅሰዋል።

የሰዓት ዕላፊ ገደብ መነሳቱን በተመለከተ ለፀጥታ አካላት ግንዛቤ  ተፈጥሯል ያሉት ፖሊስ አዛዡ÷ በመጪው ጥር ወር በከተማዋ በድምቀት ለሚከበረው የጥምቀት በዓል የሚመጡ እንግዶችን ለመቀበል ከወዲሁ ዝግጅት እየተደረገ መሆኑን ተናግረዋል።

የከተማዋን ሰላምና ጸጥታ ለማወክ የሚደረግ እንቅስቃሴ ሲያጋጥም ህብረተሰቡ በማንኛውም ጊዜ ለፀጥታ አካሉ ጥቆማ እንዲሰጥ ጥሪ አቅርበዋል፡፡

በጳውሎስ  አየለ