የዴሞክራሲያዊ ሥርዓት ልምምድ…ምክክር

አዲስ አበባ፣ ነሐሴ 3፣ 2018 (ኤፍ ኤም ሲ) የኢትዮጵያ ሀገራዊ የምክክር ኮሚሽን አዲስና ታሪካዊ የፖለቲካ ባህል ልምምድ አስተዋውቋል፡፡

በዚህ ነጻ፣ አካታች እና ሁሉም የሕብረተሰብ ክፍሎች በተወከሉበት የምክክር መድረክ ለመጀመሪያ ጊዜ በሺዎች የሚቆጠሩ ኢትዮጵያዊያን ለሀገራቸው ዘላቂ ሰላምና ልማት ይበጃሉ ባሏቸው ጉዳዮች ዙሪያ እየመከሩ ነው፡፡

መድረኩ ኢትዮጵያዊያን የውስጥ ጉዳዮቻቸውን በመመካከር ቅሬታዎቻቸውን በሰላማዊ ውይይቶች ለመፍታት የተያዙትን ቁርጠኝነት የሚያንጸባርቅ ነው።

ሀገራዊ የምክክር መድረኩ ጊዜያዊ የፖለቲካ እንቅስቃሴ ሳይሆን ዘላቂ መረጋጋትን፣ ሀገራዊ አንድነትን እና ጠንካራ ተቋማዊ መዋቅርን ለማረጋገጥ የተነደፈ የማህበራዊ ውል መሠረት ነው።

ሀገራዊ መግባባትን በማጎልበት በሁሉም ክልሎችና የማህበረሰብ ክፍሎች በአግባቡ የተሰበሰቡ አጀንዳዎችን የምክክር መድረኩ ከሀገራዊ ማንነት፣ ከትርክቶች፣ ከብሔራዊ ጉዳዮች፣ ከቋንቋ እና ከብዝሃነት አስተዳደር ጋር የተያያዙ መሰረታዊ ጥያቄዎችን ይፈታል።

ከተወያዮች የሚሰበሰቡ ምክረ ሃሳቦች የህዝብ ተወካዮች ምክር ቤት ለሚያከናውናቸው ተቋማዊ እና ህገ መንግሥታዊ የህግ ማሻሻያዎችና የፖሊሲ ማዕቀፎች ግብዓት በመሆን፣ የመንግሥት አስተዳደር የህዝብን          የጋራ ፈቃድ የሚያንጸባርቅ እንዲሆን ያደርጋሉ።

ሒደቱ ሰላማዊ ድርድርን እና የሰከነ ክርክርን በማለማመድ፣ የፖለቲካ ተጽዕኖንና ጫናን በማስወገድ፣ አካታች የዴሞክራሲ ባህልን በማስረጽ የህዝብ ተሳትፎ ለሀገር ግንባታ መሰረት እንዲሆን ያግዛል።

ሒደቱ የክልል ባለድርሻ አካላትን፣ የፖለቲካ ፓርቲዎችን፣ የሃይማኖት ተቋማትን፣ የሲቪል ማህበራትን፣ ወጣቶችን፣ ሴቶችን እንዲሁም የዳያስፖራን ተወካዮችን ጨምሮ የተለያዩ የማህበረሰብ ክፍሎችን አካታችነትና ተሳትፎ በተግባር የሚገለጥበትን እድል ፈጥሯል፡፡

በሁሉም ክልሎች እና ከተማ አስተዳደሮች ሰፊ የዝግጅት እና የአጀንዳ የማሰባሰብ ስራዎች ከተከናወኑ በኋላ በስምንት ዋና ዋና አጀንዳዎች ላይ ያተኮረው የቡድን ውይይቱ ውጤት እንዲሁም ጉባዔውን የተመለከቱ አዳዲስ መረጃዎች በኮሚሽኑ በኩል መላው የኢትዮጵያ ሕዝብ እንዲያውቃቸው እየተደረገ ይገኛል፡፡

በዚህም ቡድኖቹ በማንነት፣ በአስተዳደር፣ በታሪክና ትርክት ዙሪያ መግባባት እና በሀገር ግንባታ ላይ ያላቸውን እይታዎች እያጠናከሩ ይሄዳሉ፡፡ ከዛም በዋና የውይይቱ ምዕራፎች የጭብጥ ትኩረቱ ተግባራዊ ምክረ-ሃሳቦችን ወደ ማዘጋጀት ይሸጋገራል።

ሀገራዊው የምክክር መድረክ ለሰላማዊ አብሮነት እና ለጋራ ብልጽግና ዘላቂ የማይነቃነቅ መሰረት የሚጥል እንደመሆኑ በዚህ ሂደት እያንዳንዱ ተወካይ የሚያዋጣው ገንቢ ሀሳብ ብሔራዊ መግባባትን ያጠናክራል፡፡

ሀገራዊ ምክክር መጪው ትውልድ የተረጋጋች፣ ፍትሃዊ እና ለሁሉም እኩል የሆነችን ሀገር እንዲወርስ የሚያስችል የዴሞክራሲያዊ ሥርዓት ልምምድም ነው፡፡

በምሕረት ደምሴ