ኢትዮጵያ እና ሩሲያ ሶስት የሁለትዮሽ ስምምነቶችን ተፈራረሙ

አዲስ አበባ፣ ጥቅምት 19፣ 2019 (ኤፍ ኤም ሲ) ኢትዮጵያ እና ሩሲያ በ3ኛው የሩሲያ-አፍሪካ ጉባኤ ጎን ለጎን የሁለቱን ሀገራት ታሪካዊ ወዳጅነት ወደ ተጨባጭ ትብብር የሚያሸጋግሩ ሶስት የሁለትዮሽ ስምምነቶችን ተፈራርመዋል።

በውጭ ጉዳይ ሚኒስቴር ዴኤታ አምባሳደር ሀደራ አበራ እና በሩሲያ ወገን መካከል የተፈረሙት እነዚህ ስምምነቶች፣ በጤና እና በሚዲያ ዘርፎች ላይ ያተኮሩ ናቸው።

ከስምምነቶቹ መካከል የደጃዝማች ባልቻ ሆስፒታልን ለማዘመንና የህክምና አገልግሎት አሰጣጡን ለማሻሻል የሚያስችለው ውል ይገኝበታል።

በተጨማሪም የኢትዮጵያ ዜና አገልግሎት (ኢዜአ) ከሩሲያውያኑ የዜና እና ሚዲያ ተቋማት ከኢታር-ታስ (ITAR-TASS) እና ከሩሲያ ቱደይ (RT) ጋር የመግባቢያ ሰነዶችን ተፈራርሟል።

ይህ አዲስ ስምምነት በሁለቱ ሀገራት መካከል ያለውን ዘመናት የተሻገረ ወዳጅነት የሚያጠናክርና የጋራ ግቦችን ወደ ተጨባጭ ውጤት የሚቀይር አዲስ ምዕራፍ እንደሆነ የውጭ ጉዳይ ሚኒስቴር መረጃ ያመላክታል።