በጭፍራ ወረዳ ህገወጥ የጦር መሳሪያ በመደበቅ የተጠረጠሩ ግለሰቦች ተያዙ

የወረዳው ፖሊስ አዛዥ ዋና ኢንስፔክተር አብደላ ሁመድ ÷ግለሰቦቹ የተያዙት ትላንት በተደረገ ድንገተኛ ፍተሻ ነው ብለዋል።

በጭፍራ ከተማ ድንገት በተካሄደ የቤት ለቤት ፍተሻ ግለሰቦቹ ከደበቋቸው የተለያዩ የጦር መሳሪያዎች ጋር መያዛቸውን ተናግረዋል ።

በግለሰቦቹ መኖሪያ ቤቶች ተደብቀው ከተያዙ የጦር መሳሪያዎች መካከል አራት ክላሽንኮቨ ጠብመንጃና አራት ሽጉጦች እንደሚገኙበት ተናግረዋል ።

በተጨማሪም 2 ሺህ 289 የመትረየስና 112 የክላሽ ጥይቶች እንዲሁም 50 ባዶ የክላሽ ካርታና ሁለት የእጅ ቦምቦች መያዛቸውን ጠቅሰዋል ።

መሳሪያው የተገኘባቸው ተጠርጣሪዎች በህግ ቁጥጥር ስር ውለው ምርመራ እየተካሄደባቸው መሆኑን ገልጸዋል ።

የወረዳው ፖሊስ የጀመረውን ህገወጥ የጦር መሳሪያ ቁጥጥር ስራ አጠናክሮ እንደሚቀጥል አመላክተዋል ።

ፖሊስ የህዝብና የሀገርን ሰላምና ደህንነት የሚያውኩ ህገወጥ እንቅስቃሴዎች ለመቆጣጠር በሚያደርገው ጥረት ህብረተሰቡ ተሳትፎውን አጠናክሮ እንዲቀጥል ዋና ኢንስፔክተር አብደላ መጠየቃቸውን ኢዜአ ዘግቧል።