‎ዘይሕጋዊ ፍልሰት ንዜጋታትን ሃገርን ልዑል ጉድኣት ዘስዕብ እዩ – ኤርጎጌ ተስፋዬ (ዶ/ር)

ኣዲስ ኣበባ፣ 8 ነሓሰ፣ 2018 (ኤፍ ኤም ሲ)ዘይስሩዕ ፍልሰት ኣብ ልዕሊ ዜጋታትን ሃገርን ልዑል ጉድኣት ዘስዕብ እዩ ኢለን ሚኒስትር ደቂ ኣንስትዮን ማሕበራዊ ጉዳይን ኤርጎጌ ተስፋዬ (ዶ/ር)።

ኢትዮጵያን ማላዊን ዘይሕጋዊ ፍልሰትን ዶብ ሰገር ገበናትን ብሓባር ንምክልኻል ዘኽእለን ናይ ምርድዳእ ስምምዕነት ተፈራሪመን።

ኤርጎጌ ተስፋዬ (ዶ/ር) ኣብቲ እዋን ከምዝገለፅኦ፥ ፍልሰት ዕድላትን ብድሆታትን ዘለዎ ዝተሓላለኸ መስርሕ እዩ።

ፍልሰት ብግቡእ ምምሕዳር እንተተኻኢሉ፥ ማሕበራዊን ቁጠባዊን ልምዓት ንምቅልጣፍን ዞባዊ ውህደት ንምጥንኻርን ክሕግዝ ከምዝኽእል ገሊፀን።

ብኣንፃሩ ግን ዘይሕጋዊ ፍልሰት ኣብ ልዕሊ ዜጋታትን ሃገርን ልዑል ጉድኣት ከምዘስዕብ ተዛሪበን።

ኢትዮጵያ ብምክትል ቀዳማይ ሚኒስተር ተመስገን ጥሩነህ ዝምራሕ ብሄራዊ ቤት ምኽሪ ቤት ሓዊሱ፥ ኣብ ጥንኩር ፖሊሲ፣ ናይ ሕጊን ትካላዊ ኣወዳድባታትን ኣቢላ ዘይሕጋዊ ፍልሰት ንምቅላስ ፃዕሪ እናገበረት ከምዘላ ኣመልኪተን።

ኢትዮጵያ ናይ ፍልሰት መበገሲት፣ መሰጋገሪትን መዕረፊትን ሃገር ከምዝኾነት፤ ማላዊ ድማ ናብ ደቡብ ኣፍሪካ ዝወስድ ደቡባዊ መንገዲ ቀንዲ ኮሪደርን ዋና መስመር መጓዓዝያ ከምዝኾነት ኣመልኪተን።

ማላዊ ንተጓዓዝቲ ፍልሰት ብምዕቋብ፣ ናብ ሃገሮም ክምለሱ ብምግባር፣ ከምኡ’ውን ብዝተወደቡ ገበናተኛታት ናብ ፍትሒ ኣብ ምቕራብ ትገብሮ ዘላ ኣስተዋፅኦ ዝተባባዕ ምዃኑ ተዛሪበን።

ሚኒስትር ድሕንነት ውሽጢ ሃገር ሪፐብሊክ ማላዊ ፒተር ሙኩሂቶ ብወገኖም፥ ዜጋታት ንምድሓንን ዶብ ሰገር ገበን ንምዕጋት ማላዊ ብቆራፅነት ከምትሰርሕ ኣረጋጊፆም።