አልማ ከግማሽ ቢሊየን ብር በላይ በሆነ ወጪ ያስገነባቸውን ፕሮጀክቶች ሊያስመርቅ ነው

On Jul 7, 2025 130

አዲስ አበባ፣ ሰኔ 30፣ 2017 (ኤፍ ኤም ሲ) የአማራ ልማት ማህበር (አልማ) በክልሉ የተለያዩ ዞኖች ግንባታቸው ተጠናቅቀው ለአገልግሎት ዝግጁ የሆኑ የልማት ፕሮጀክቶችን ሊያስመርቅ ነው፡፡

በአልማ የስትራቴጂና ኢኖቬሽን ም/ዋና ሥራ አስፈጻሚ አቶ አበረ መኩሪያ በሰጡት መግለጫ÷ ማህበሩ በክልሉ ሁሉም ዞኖች የትምህርት፣ ጤና እና የሥራ ዕድል ፈጠራ ፕሮጀክቶች መገንባቱን ተናግረዋል፡፡

ፕሮጀክቶቹ ከሐምሌ 1 አስከ 15 ቀን 2017 ዓ.ም የሚከበረውን የአልማ ሳምንት ምክንያት በማድረግ የሚመረቁ ሲሆን÷ ለመሰረተ ልማቶቹ ከ645 ነጥብ 1 ሚሊየን ብር በላይ መጪ ተደርጓል ብለዋል፡፡

አልማ ባለፉት 32 ዓመታት ከአባላትና ከአጋር አካላት በተገኘ ሃብት የተለያዩ ሥራዎችን እያከናወነ መሆኑን ጠቁመው÷ አሁን ላይ ከ4 ነጥብ 6 ሚሊየን በላይ መደበኛ አባላት እንዳሉት አንስተዋል፡፡

ማኅበሩ ከ2012 እስከ 2016 ዓ.ም ባሉት አምስት ዓመታት ብቻ ከ7 ነጥብ 8 ቢሊየን ብር በላይ ሃብት በማሠባሠብ የተለያዩ ሥራዎችን ማከናወኑን አመልክተዋል፡፡

በምናለ አየነው

ፈጣን እና ወቅታዊ መረጃዎችን ለማግኘት፡-