ኢትዮጵያ ታዳሽ ሃይልን በማልማት ምስራቅ አፍሪካን በኤሌክትሪክ ለማስተሳሰር እየሰራች ነው

On Aug 30, 2025 39

አዲስ አበባ፣ ነሐሴ 24፣ 2017 (ኤፍ ኤም ሲ) ኢትዮጵያ በታዳሽ ሃይል ያላትን ዕምቅ ሃብት በማልማት ምስራቅ አፍሪካን በኤሌክትሪክ ለማስተሳሰር እየሰራች ነው አሉ የውሃና ኢነርጂ ሚኒስትር ሃብታሙ ኢተፋ (ዶ/ር) ፡፡

ሚኒስትሩ ኢትዮጵያ የቀጣናው ሀገራትን በኤሌክትሪክ በማስተሳሰር የአፍሪካ የሃይል ቋት ለመሆን ያስቀመጠችውን ግብ ለማሳካት ያላትን የተፈጥሮ ሃብት ጥቅም ላይ እያዋለች ትገኛለች ብለዋል፡፡

ኢትዮጵያ በሃይል አቅርቦት እያከናወነቻቸው ያሉ የመሰረተ ልማት ዝርጋታዎች ከቀጣናው ባለፈ ሌሎች ሀገራትን ተጠቃሚ ለማድረግ ያችላሉም ነው ያሉት፡፡

የኢትዮጵያ ዕምቅ የውሃ፣ የንፋስና የፀሐይ ተፈጥሮ ሃብቶች የኤሌክትሪክ ሃይል ለማልማት፣ ለማመንጨትና ለማሰራጨት ከፍተኛ አቅም እንደሚፈጥሩ አመልክተዋል፡፡

ኢትዮጵያ ባለፉት አምስት ዓመታት የኤሌክትሪክ ኃይል አቅርቦትን ለማሳደግ ያከናወነቻቸው ተግባራት ውጤታማ መሆናቸውን አንስተዋል፡፡

እየተካሄዱ ያሉ የመሰረተ ልማት ግንባታዎች ኢትዮጵያ ቀጣናውን በኤሌክትሪክ ኃይል በማገናኘት ቀዳሚውን ስፍራ እንድትይዝ ያደርጋታል ብለዋል።

የሕዳሴ ግድብን ጨምሮ እየተከናወኑ የሚገኙ የታዳሽ ኃይል ልማት ሥራዎች ከራሷ አልፎ ጎረቤት ሀገራትን ለማስተሳሰር የጀመረችውን ጥረት እንደሚያፋጥኑ መጥቀሳቸውንም ኢዜአ ዘግቧል፡፡

ፈጣን እና ወቅታዊ መረጃዎችን ለማግኘት፡-