Yaa’ii 2ffaan babal’ina Biiznasii Itiyoo-Jibuutii gaggeeffamaa jira

Finfinnee, Fulbaana 19, 2018 (FMC) – Yaa’ii 2ffaan babal’ina Biiznasii Itiyoo-Jibuutii mata duree “ Dhiyeessii Loojistiksii Walitti Hidhamiinsa Biiznasii Naannawaaf” jedhuun Jibuutiitti gaggeeffamaa jira.

Pirezidaantii itti aantuu Mana Maree Damee Daldalaa Itiyoophiyaa Dooktar Ayinaalam Abbaayinee fi Ministira Daldalaafi Tuurizimii Jibuutii Mohaammad Waarsaamaa Diireehi dabalatee hoggantoonni dhaabbilee seekterichaa biroon yaa’icharratti argamaniiru.

Yaa’ichi tumsa loojistiksii biyyoota lameenii cimsuuf kan kaayyeffate yoo ta’uun eerameera.

Pirezidaantiin Waldaa Damee Loojistiksii Itiyoophiyaa Eelsaabeet Geetaahun, yaa’ichi rakkoolee damee loojistiksii maqsuun guddina biiznasii walitti fufiinsa qabu saffisiisuuf akka gargaaru ibsan.

Yaa’ichi carraa guddinaafi tiraanisfoormeeshiniin uumuun naannawichatti tumsa fakkeenyummaa qabu akka ta’us kaasaniiru.

Ministirri Ministeera Daldalaafi Tuurizimii Jibuutii Mohaammad Waarsaamaa Diireehi gamasaaniin, yaa’ichi tumsa daldalaa biyyoota lameenii guddisuun Kooridarii Itiyoo-Jibuutii caalmaatti bu’aa qabeessa akka godhu ibsaniiru.

Biyyoota lameen gidduutti walitti hidhamiinsa, ce’umsa beekumsaa fi waltajjii tumsa tarsiimawaa kan uumu ta’uus dubbatan.

Ashannaafii Shibbiruutu Gabaase.

#Oromia #Ethiopia

Odeeffannoowwan waqtaawaa dabalataa argachuuf;

Teelegiraama t.me/afanoromofana

Yuutiyuubii Afaan Oromo: www.youtube.com/@fmcafaanoromoo

Marsariitii www.fanamc.com/afaanoromoo

Tiwiitara https://twitter.com/fanatelevision

Feesbuukii: www.facebook.com/afaanoromoofana

Tiktok https://www.tiktok.com/@fana_afaan_oromoo

Yeroo maraa nu waliin waan taataniif isin galateeffanna.