የዘመን መለወጫ በዓል ምንም ዓይነት የእሳት አደጋ ሳይከሰት በሠላም ማለፉን ኮሚሽኑ ገለጸ
አዲስ አበባ፣ መስከረም 2፣ 2015 (ኤፍ ቢ ሲ) የአዲስ ዓመት በዓል የእሳትና ድንገተኛ አደጋዎች ሳያጋጥሙ በሠላም ማለፉን የአዲስ አበባ ከተማ አስተዳደር የእሳትና የአደጋ ስጋት ሥራ አመራር ኮሚሽን አስታወቀ።
ኅብረተሰቡ የጥንቃቄ መልዕክቶችን በአግባቡ በመተግበር ላሳየው ትብብርም ኮሚሽኑ ምስጋናውን አቅርቧል።
የኮሚሽኑ የሕዝብ ግንኙነት ባለሙያ አቶ ንጋቱ ማሞ ÷በዓሉ ዋዜማ ከምሽቱ 4 ሰዓት ከ20 ግን በኮልፌ ቀራኒዮ ክ/ከተማ ልዩ ቦታው ወረዳ 6 መዝናኛ ክበብ በዝናብ የረጠበ ችቦ ተገቢ ባልሆነ መልኩ ከመጠን በላይ ቤንዚን በመጨመር እና በማቀጣጠል ድንገተኛ የእሳት አደጋ መከሰቱን ተናግረዋል፡፡
ኮሚሽኑ በደረሰው ጥቆማ የአደጋ ሰራተኞች በስፍራው ደርሰው እሳቱ ተዛምቶ ጉዳት ሳያደርስ በቁጥጥር ስር ማዋላቸውን ጠቁመዋል።
በተመሳሳይ ዕለት ስድስት ኪሎ ሐምሌ 19 መናፈሻ አካባቢ በሚገኝ የፍሳሽ ማስወገጃ ጉድጓድ ውስጥ የ60 ዓመት አዛውንት ሕይወታቸው አልፎ መገኘቱን ነው የገለጹት።
ፖሊስ አስክሬኑን ተረክቦ የአደጋውን መንስዔ በመመርመር ላይ እንደሚገኝ መናገራቸውን ኢዜአ ዘግቧል፡፡
ኅብረተሰቡ የእሳትና ድንገተኛ አደጋ ሲያጋጥም በነጻ የስልክ መስመር 939፣ በቀጥታ የስልክ መስመሮች 011 155 53 00 ወይም በ011 156 86 01 ደውሎ ማሳወቅ እንደሚችል አቶ ንጋቱ ጠቁመዋል።