በክልሉ በተደረገ የግብርና ምርታማነትን የማሳደግ ንቅናቄ አዳዲስ ምርቶችን ማምረት ተጀምሯል

On Aug 1, 2025 75

አዲስ አበባ፣ ሐምሌ 25፣ 2017 (ኤፍ ኤም ሲ) በማዕከላዊ ኢትዮጵያ ክልል በተደረገ የግብርና ምርታማነትን የማሳደግ ንቅናቄ በርካታ ወረዳዎች አዳዲስ ምርቶችን ማምረት ጀምረዋል።

በክልሉ በተለያዩ ዞኖች የሚገኙ በርካታ ወረዳዎች ከዚህ በፊት የማያመርቷቸውን የጥራጥሬ፣ የሰብል፣ የፍራፍሬ እና የእንስሳት ምርቶች እያመረቱ ነው፡፡

በምክትል ርዕሰ መስተዳድር ማዕረግ የገጠር ልማት ክላስተር አስተባባሪና የክልሉ ግብርና ቢሮ ኃላፊ አቶ ኡስማን ሱሩር እንዳሉት፤ ግብርናን በማዘመን ምርታማነትን ለማሳደግ በስፋት እየተሰራ ነው።

ለክልሉ ሥነ ምህዳር ተስማሚ የሆኑ አዳዲስ ምርቶችን የማስተዋወቅ ሥራ እየተሰራ እንደሆነ ጠቅሰው፤ በዚህም በርካታ ወረዳዎች ከዚህ ቀደም የማያለሟቸውን ምርቶች ወደ ማልማት ገብተዋል ነው ያሉት።

በዚህም ቀደም ሲል በሶስት ወረዳዎች ብቻ ይመረት የነበረው የሙዝ ተክል በአሁኑ ወቅት ወደ 16 ወረዳዎች እንዲስፋፋ መደረጉን ገልጸዋል።

24 ወረዳዎች ፓፓያ 44 ወረዳዎች ደግሞ አቮካዶ ማምረት መጀመራቸውን ጠቁመዋል።

የቴክኖሎጂ አጠቃቀምን በማሳደግ በኩታ ገጠም እርሻ ምርታማነትን ማሳደግ ተችሏል ብለዋል።

በታሪክ አዱኛ

ፈጣን እና ወቅታዊ መረጃዎችን ለማግኘት፡-