ወርሒ መስከረም፡ ህብረ ብሄራዊ ፅባቐን ቱሪዝምን

ኣዲስ ኣበባ፣ 14 መስከረም፣ 2019 (ኤፍ ኤም ሲ) ኣብ ኢትዮጵያ ኣቆፃፅራ ዘበን ፈላማይ ዝኾነ ወርሒ መስከረም ባህሊ ሃፍቲ እታ ሃገር ንዓለም ዘላልዩ ዝተፈላለዩ ፍፃመታትን ኣደባባይ በዓላት ዝካየዱሉ ብምዃኑ ወርሒ ቱሪዝም ኢትዮጵያ ተባሂሉ ይፅዋዕ።

ኣብዚ ሓድሽ ተስፋን ሓድሽ ጅማሮን ዕድል ዝኾነ እዋን፣ ዓሚቕ ማሕበራውን ባህላውን መሰረት እታ ሃገር ዘንፀባርቑ ብዙሓት ድሙቓት በዓላት ሰባት ብሓድነት ይእክቡ።

ሕቡራት መንግስታት ትምህርቲ፣ ትካል ሳይንስን ባህልን (ዩኔስኮ) ኣብ ቅርሲ ዓለም ዘመዝገቦ በዓል ደመራ መስቀል ብመላእ ተኸተልቲ እምነት ኦርቶዶክስ ኢትዮጵያ ብድምቀት ዝኽበር በዓል እዩ።

እዚ ሃይማኖታዊ መሰረት ዘለዎ በዓል ብዝተፈላለዩ ማሕበራዊ ምትእስሳራትን ታሪኻዊ ፍፃመታትን ድሙቓት ሃይማኖታውን ባህላውን ስነ-ስርዓታት ዘለዎ ብምዃኑ፣ ኣብ ወርሒ መስከረም ዓለም ለኸ በፃሕቲ ናብ ኢትዮጵያ ክውሕዙ ዝገብር ሃፍቲ እታ ሃገር እዩ።

በዓል መስቀል ሰዒቡ ዝመፅእን ሓደ ካብ መግለፂታት ስርዓተ ገዳ ዝኾነን ዓቢዪ ናይ ምስጋና በዓል ህዝቢ ኦሮሞ ኢሬቻ ብሚሊየናት ተሳተፍቲ ተኣኪቦም ካብ ፀልማት ናብ ብርሃን ዘሰጋገሮም ፈጣሪ ምስጋና ዝቕርቡሉ በዓል እዩ።

እዋን ክረምቲ ብሰላም ስለ ዝሓለፈ ምስጋና ካብ ምቕራብ ብተወሳኺ ኣብቲ ዝተታሕዘ ዓመት ሰላም፣ ጥዕናን ፍርያትን ንኽህሉ ዝፅልይሉ፣ ዕርቅን ሓቢርካ ምንባርን ዝጠናኸረሉ በዓል እውን እዩ ኢሬቻ።

እዞም በዓላት ንወፃኢ ሃገር በፃሕቲ ዝስሕቡ ካብ ምዃኖም ብተወሳኺ ጋያሹን እታ ሃገርን ህዝባን ከምኡውን ህያው ባህላዊ ክብሪታት ብተወሳኺ ዘርእዩ እዮም።

እዞም በዓላት ኣብ ዓውዲ ቱሪዝም ካብ ዘለዎም ኢኮኖሚያዊ ኣበርክቶ ብተወሳኺ ማሕበራዊ ምትእስሳር ኣብ ምጥንኻር ዓቢዪ ግደ ይፃወቱ።

ሰላምን ዕርቅን ብምስትምሃር ሃገራዊ እሴታት ዘጉልሑ ናይ ኣደባባይ በዓላት ኣብ ሕብረተሰብ ዘሎ ሃገራዊ ሓድነትን ሕውነትን የጠናኽሩ።

መንግስቲ መደመር ናይ ኣደባባይ በዓላት ሓዊሱ ሃፍቲ እታ ሃገር ብምልማዕ ዓውዲ ቱሪዝም ቀንዲ ዓንዲ ኢኮኖሚ ንኽኸውን ዘኽእል ማዕቀፍ ፖሊሲ ብምምሕያሽ ንፈጠራ ዕድል ስራሕን ንዕዉት ህንፀት ምስሊ ሃገርን ትኹረት ብምሃብ ናብ ስራሕ ኣትዩ ይርከብ።

ሓደሽቲ መባፅሕ ቱሪስታት፣ ዘበናዊ ኢኮ-ሎጅታት፣ መናፈሻታት ከተማን ብምስፋሕ፣ መሰረተ-ልምዓት ቱሪዝም ብምልማዕ፣ ስትራቴጂካዊ ወፍሪ መንግስቲ ንኢትዮጵያ ኣብ ዓለም ተመራፂት መባፅሕ ቱሪዝም እናገበራ ይርከብ።

ብዩኔስኮ ኣብ ዝርዝር ቅርሲ ዓለም ዝተመዝገቡ ከም ኣብያተ ክርስቲያናት ውቅር ላሊበላ፣ ግቢ ፋሲል ጎንደር፣ ሓወልቲታት ኣኽሱምን ታሪኻዊ ግንቢ ጁገል ሓረርን ዝኣመሰሉ ቅርስታት ሓዊሱ፣ መበቆልን ታሪኻዊ ትሕዝቶ እቶም ቅርስታት ከይተበላሸወ ንወለዶ ንምስግጋር ዝዓለመ ስራሕ ሓለዋን ምሕዳስን ቅርስታት እውን እናተኻየደ ይርከብ።

ብምሕረት ደምሴ