ከንቲባ አዳነች በተስፋ ብርሃን የምገባ ማዕከል በመገኘት በዓሉን በጋራ አሳለፉ

በዚሁ ወቅት ከንቲባ አዳነች ፥ “ዛሬ አዲሱ አመት ገና ሲጀምር ከእናንተ ጋር ማዕድ በመቋደስ ለእናንተ ፍቅር በመስጠት ማሳለፍ መታደል ነው ፤ ትልቅ ደስታንም የሚሰጥ ነው” ብለዋል፡፡

ወገን ለወገን መተሳሰብ እሴታችን ማደግ ያለበትና ለትውልድ መተላለፍ ያለበት ነውም ብለዋል ፡፡

የቢኬጂ ፋውንዴሽን ባለቤት አቶ በላይነህ ክንዴ በበኩላቸው፥ ድርጅታቸው በማህበራዊ ግልጋሎት፣ በትምህርት በጤናና ስፖርት የተለያየ ሃገራዊ ጉዳዮች እየተሳተፈ እንደሚገኝ ገልፀው፥ ይህም የምገባ ማእከል በ20 ሚሊየን ብር ተገንብቶ ወደ ተግባር መግባቱን አስታውሰዋል፡፡

አሁንም በምገባ ማእከሉ ሴቶችን አደራጅቶ ወደ ስራ በማስገባት የ800 ሺህ ብር እቃ ምገባውን የሚያከናውኑበት እንዲሁም ለስራ ማስጀመርያ የ200 ሺህ ብር ድጋፍ እንደሚያስረክቡም ገልፀዋል፡፡

የቂርቆስ ቢኬጂ ፋውንዴሽን የተስፋ ብርሃን የምገባ ማእከል በቀን አንድ ጊዜ መመገብ የማይችሉ ዜጎችን በመመገብ ላይ እንደሚገኝ መገለፁን ከከንቲባ ፅ/ቤት ያገኘነው መረጃ ያመላክታል፡፡