የባንዳነት ማሳያ፤ ሕገ ወጡ የሕወሓት ቡድን

አዲስ አበባ፣ መስከረም 29፣ 2019 (ኤፍ ኤም ሲ) የሀገር ሉዓላዊነት እና የሕዝብ ክብር ከምንም በላይ በሆነባት የኢትዮጵያ ታሪክ ውስጥ፣ የባንዳነት እና የክህደት ጥቁር ጠባሳ ጥለው ለማለፍ የሞከሩ ስብስቦች ጥቂት አይደሉም።

ከእነዚህም መካከል በገዛ እናት ሀገሩ ላይ የጀርባ ቢላዋ በመሰካት፣ የሀገር መከላከያን በሌሊት የከዳው እና በጥቅም የተገዛው የሕገ-ወጡ ሕወሓት ቡድን ግንባር ቀደሙን ስፍራ ይይዛል።

ይህ ስብስብ የስልጣን ጥማቱን ለማርካትና የዘረፋ ስርአቱን ለመቀጠል ሲል፣ የሀገርን ህልውና ለታሪካዊ ጠላቶች አሳልፎ ለመስጠት ያደረገው እንቅስቃሴ ዛሬ ላይ በጀግናው የሀገር መከላከያ ሠራዊት ብርቱ ክንድ ተመትቶ ፍጹም ውርደትን ተከናንቧል።

የዚህ ከሃዲ ስብስብ ማንነትና የባንዳነት ጉዞ መነሻውን ያደረገው፣ ቡድኑ የሀገርን መከላከያ ሠራዊት በክህደት ከመታበት ማግስት ጀምሮ በራሱ አቅም መቆም እንደማይችል ጠንቅቆ በማወቁ ነው። በመሆኑም ቀጥታ የሮጠው ወደ ባዕዳን ሀገራት እና የውጭ ኃይላት ጉያ ነበር።

በዚህም የኢትዮጵያን መዳከም እና መበታተን ከሚፈልጉ ታሪካዊ ጠላቶች ጋር በማበር፣ ሀገርን በዲፕሎማሲ፣ በኢኮኖሚ እና በፕሮፓጋንዳ ለማፈራረስ ሌሊት ከቀን ሠርቷል።

ይህ የክህደት ሩጫ የሀገርን ምሥጢር አሳልፎ ከመስጠት አልፎ፣ የውጭ ኃይላት በኢትዮጵያ የውስጥ ጉዳይ ላይ እጃቸውን እንዲያስገቡ እስከመማጸን የደረሰ ፍጹም ታሪካዊ የባንዳነት ማሳያ ነበር።

ይሁን እንጂ ቡድኑ በውጭ ኃይላት ድጋፍ ታግዞ የኢትዮጵያን አንድነት ለመናድ ቢሞክርም፣ የገጠመው ግን የማይበገረውን እና የሀገር አለኝታ የሆነውን የመከላከያ ሠራዊትን ነው።

የሠራዊቱ ጀግንነት እና ስልታዊ ጥቃት የከሃዲውን ስብስብ እቅድ ያፈራረሰ ሲሆን፤ ቡድኑ በጦር ግንባር መቋቋም አቅቶት ወደ መፈርጠጥ ገብቷል። ትናንት በትዕቢት ይፎክር የነበረው ይህ ስብስብ፣ ዛሬ በጀግናው ሠራዊት የረቂቅ እና የፊት ለፊት ውጊያ ብቃት እየተመታ፣ መደበቂያ በማጣት በየጫካው እና በየባዕዳኑ ኤምባሲ ደጅ ሲሯሯጥ ታይቷል።

ይህ መፈርጠጥ ተራ ሽንፈት ብቻ ሳይሆን፤ የተቋሙን የሞራል እና የታሪክ ውድቀት ጭምር አጉልቶ ያሳየ ነው።

የዚህ ከሃዲ ስብስብ ሩጫ ዛሬ ላይ መላው የዓለም ሕዝብ የታዘበበት ታላቅ ውርደት ሆኗል። ባዕዳን ኃይላት ጥቅማቸውን ለማስከበር ሊጠቀሙበት የሞከሩት ይህ ባንዳ ስብስብ፣ ተላላኪነቱ ሲያበቃለት እና በኢትዮጵያውያን ፅናት ሲሸነፍ የያዙት የውጭ አጋሮቹም ጭምር ፊታቸውን እንዲያዞሩበት አድርጓል።

በገዛ እናት ሀገር ላይ ክህደት ፈጽሞ በድል መውጣት እንደማይቻል፣ ይልቁንም ታሪካዊ ውርደትን ተከናንቦ በሕዝብ ዘንድ መወገዝን እንደሚያተርፍ ይህ ቡድን ሕያው ምስክር ነው።

በአጠቃላይ የሕገ-ወጡ ሕወሓት ሩጫ ፍጻሜው መፈርጠጥ፣ መዋረድ እና በታሪክ የባንዳነት መዝገብ ላይ በግንባር ቀደምትነት መስፈር ሆኗል።

ይህም የኢትዮጵያ ጀግና መከላከያ ሠራዊት እና ሕዝብ በጋራ የቆሙለትን ሉዓላዊነት ማንም የውጭ ኃይልም ሆነ የውስጥ ባንዳ ሊደፍረው እንደማይችል በተግባር ያረጋገጠ ደማቅ የታሪክ ምዕራፍ ነው።

በኃይለኢየሱስ መኮንን