Israa’el waliigaltee dhukaasa dhaabuu Gaazaa raggaasiste

Finfinnee, Fulbaana 30, 2018(FMC)- Kaabineen Dhimma Nageenyaa Israa’el waliigaltee dhukaasa dhaabuu Gaazaa marsaa jalqabaa sagalee caalmaan raggaasiseera.

Wajjiirri Ministira Muummee Beeniyaamiin Niitaaniyaahuu akka beeksisetti, waliigalteen dhukaasa dhaabuu Gaazaa Pirezidaantii Ameerikaa Doonaaldi Tiraampiin dhiyaate lammiilee Israa’el ugguraman kan gadi lakkisiisuufi nageenya waaraa ni fida jedhamee itti amanameera.

Bu’uura waliigaltichaan Israa’el kutaa Gaazaa %53 ta’u keessaa loltoota ishee kan baastu yoo ta’u, Hamaas ammoo lammiilee Israa’el uggure 20 sa’aatii 72 keessatti gadi lakkisa.

Dabalataan Israa’el hidhamtoota 250 fi namoota duula Gaazaan to’atte kuma 1 fi 700 ol kan gadi lakkistu ta’uu BBC’n gabaaseera.

Anga’aa olaanaan Hamaas Kaaliil Al-Haayaan gama isaaniin, waliigalteen dhukaasa dhaabuu pirezidaanti Doonaaldi Tiraampi dhiyeessan nageenya waaraa kan fidu ta’uu ibsaniiru.

Garechi waliigaltee kanaaf deebii ariifachiisaa kennuu kaasanii, walgaltichi rakkoo tokko malee hojiirra akka ooluuf Waashingitan irraa waan amansiisaa arganneerra jedhan.

Waliigalticha hojiirra oolchuuf Hamaas humnoota Gaazaa keessa socho’an biroo waliin hojjechuuf kutannoo qabaachuus mirkaneessaniiru.

Waliigaltee kana hordofee Mootummoonni Gamtoomanii nyaata, qorichaafi boba’aa gara Gaazaatti geejjibsiisuuf qophii ta’uunis ibsameera.

Miikiyaas Ayyalaan.

#Oromia #Ethiopia

Odeeffannoowwan waqtaawaa dabalataa argachuuf;

Teelegiraama t.me/afanoromofana

Yuutiyuubii Afaan Oromo: www.youtube.com/@fmcafaanoromoo

Marsariitii www.fanamc.com/afaanoromoo

Tiwiitara https://twitter.com/fanatelevision

Feesbuukii: www.facebook.com/afaanoromoofana

Tiktok https://www.tiktok.com/@fana_afaan_oromoo

Yeroo maraa nu waliin waan taataniif isin galateeffanna.