Ergaa Pireezidaantii Mootummaa Naannoo Oromiyaa Obbo Shimallis Abdiisaa.

𝐇𝐮𝐦𝐧𝐨𝐨𝐭𝐚 𝐖𝐚𝐥𝐨𝐨: 𝐊𝐚𝐚𝐩𝐩𝐢𝐭𝐚𝐚𝐥𝐚 𝐐𝐚𝐫𝐨𝐨𝐦𝐢𝐧𝐚𝐚𝐫𝐫𝐚𝐚 𝐆𝐚𝐫𝐚 𝗗𝐡𝐚𝐚𝐛𝐛𝐢𝐥𝐞𝐞 𝐀𝐦𝐦𝐚𝐲𝐲𝐚𝐚𝐭𝐭𝐢
𝗜. 𝗠𝗼𝗼𝘁𝘂𝗺𝗺𝗮𝗮𝗻 𝗗𝗮𝗻𝗱𝗲𝗲𝘁𝘁𝗶𝗶 𝗛𝗮𝘄𝗮𝗮𝘀𝗮𝗮 𝗛𝗶𝗻𝘂𝘂𝗺𝘂; 𝗡𝗶𝘀𝗶𝗿𝗻𝗲𝗲𝘀𝘀𝗮
Ciminni mootummaa tokkoo humna hawaasaa haaraa uumuu miti.

Humna hawaasa keessa jiru adda baasuu, sirneessuufi gara dandeettii oomishtummaatti jijjiiruudha. Garaagarummaan mootummaa cimaafi laafaa qabeenya osoo hintaane, akkaataa dandeettii hawaasaa itti hubatuufi itti qindeessuudha.

Kunis garaagarummaa mootummaa ammayyaa murteessudha. Mootummaan waan hinjirre uumuun hinjalqabu; waan duraan jiru sirnaan hubachuun jalqaba. Sababni isaas, hawaasni mootummaa dura jiraata.

Qaroominni hawaasaa itti-gaafatamummaa waloo — wal-amantaa, wal-tumsa, beekumsaafi dandeettii gochuu — dhalootaa gara dhalootaatti kuusa. Dandeettiin kun yeroo baayyee mootummaa keessatti sirnaa’ee iddoo waan hinqabneef hawaasa keessatti faca’ee hafa. Kanaaf, gaheen mootummaa humna hawaasaa bakka bu’uu miti; sirneessuudha.

Yaanni kun mootummaa xiqqeessu fakkaachuu danda’a. Dhugaan jiru garuu faallaa isaati.

Mootummaan humna hawaasaa bakka bu’ee hojjechuu jalqabnaan, dandeettiin hawaasaa suuta suutaan laafaa deema; hawaasni eeggataa mootummaa ta’a.

Mootummaan kaappitaala kana qindeessee yoo sirnoomse garuu, mootummaaafi hawaasni wal-cimsanii hojjechuu jalqabu. Kanaaf, gaheen mootummaa hojii mara ofiin qofa raawwachuu miti; humna hawaasaa qindeessee gara hojii woloo bu’a qabeessaatti qajeelchuudha.

Seenaa addunyaa keessatti mootummaa milkaa’e adda kan taasisu hojii inni kophaa isaa raawwate miti. Dandeettii hawaasa isaa sirnaan gurmeessuu danda’uu isaati.

Qabeenyi umamaa guddaan jiraatullee, dandeettiin hawaasaa yoo hinqindoomne badhaadhinni hinmirkanaa’u.

Faallaa kanaa, dandeettiin hawaasaa sirnaan yoo gurmaa’e, qabeenyi muraasnillee gara oomishtummaa olaanaatti jijjiiramuu danda’a. Kanaaf, bu’uurri mootummaa cimaa bulchiinsa qabeenya umamaa qofa osoo hintaane, bulchiinsa dandeettii hawaasaati; sirnoomsa dandeettii hawaasaati.

Ija kanaan, dandeettiin hawaasaa kaappitaala qaroominaa ta’ee hubatama.

Yeroo adda baafamee sirnaa’ee dhaabbata mootummaa keessatti iddoo argatu, humna hawaasaa ta’uurraa gara humna hawaas-mootummaa qindaa’eetti ce’a; yeroo hojiirra oolummoo gara dandeettii oomishtummaatti jijjiirama.

Mootummaan humna hawaasaa hinuumu; adda baasa, sirneessa, gara dandeettii oomishtummaatti jijjiira.

𝗜𝗜. 𝗦𝗶𝗿𝗻𝗮 𝗚𝗮𝗱𝗮𝗮: 𝗠𝗮𝗱𝗱𝗮 𝗞𝗮𝗮𝗽𝗽𝗶𝘁𝗮𝗮𝗹𝗮 𝗤𝗮𝗿𝗼𝗼𝗺𝗶𝗻𝗮𝗮

Safartuun qaroomina saba tokkoo qabeenya horate qofa miti. Sirnoota ijaare, beekumsa kuuse, safuu dagaagse, akkasumas dandeettii hawaasaa sirnaan gurmeesse. Kanaaf, qabeenyi guddaan qaroomina tokkoo yaadannoo seenaa isaa qofa miti; 𝗸𝗮𝗮𝗽𝗽𝗶𝘁𝗮𝗮𝗹𝗮 𝗵𝗮𝘄𝗮𝗮𝘀𝘂𝗺𝗺𝗮𝗮 inni dhalootaaf dhaalchiseedha.

Ija kanaan, Sirni Gadaa kaappitaala qaroomina Oromoo isa guddaadha. Ummanni Oromoo mootummaa qofa osoo hintaane, hawaasa ofiin of-bulchu ijaareera.

Sirnoota itti-gaafatamummaa waloo — wal-amantaa, wal-tumsaa, haqaa, araaraa, nageenyaa, eegumsa qabeenya umamaafi tajaajila hawaasaa — dhalootaa gara dhalootaatti gabbisuun kaappitaala hawaasummaa cimaa horeera. Kaappitaalli kun bu’aa aadaa qofa osoo hintaane, bu’aa sirna hawaasaa qindaa’e ture.

Sirnoonni kunneen hojii dhuunfaa osoo hintaane dhaabbilee hawaasaa turan.

Tokkoon tokkoon isaanii hojii murtaa’aa, itti-gaafatamummaa ifaafi seera hawaasni fudhate ittiin taliigamu qabu ture.

Humni isaanii fedhii dhuunfaarraa osoo hintaane, sirna hawaasaarraa madde. Kunis dhugaa bu’uuraa tokko mirkaneessa: 𝗾𝗮𝗿𝗼𝗼𝗺𝗶𝗻𝗻𝗶 𝗱𝗵𝗮𝗮𝗯𝗯𝗶𝗹𝗲𝗲 𝗵𝗮𝘄𝗮𝗮𝘀𝗮𝗮 𝘂𝘂𝗺𝗮; 𝗱𝗵𝗮𝗮𝗯𝗯𝗶𝗹𝗲𝗲𝗻 𝗵𝗮𝘄𝗮𝗮𝘀𝗮𝗮 𝗮𝗺𝗺𝗼𝗼 𝗱𝗮𝗻𝗱𝗲𝗲𝘁𝘁𝗶𝗶 𝗵𝗮𝘄𝗮𝗮𝘀𝗮𝗮 𝘂𝘂𝗺𝘂.

Haata’u malee, adeemsa seenaa keessa, dhiibbaan siyaas-dinagdeefi hawaasummaa dhaabbilee kanneen irratti taasifamaa ture humna dhaabbatummaa isaanii laaffisee ture.

Kana jechuun garuu dandeettiin isaanii bade jechuu miti; dhaabbatummaa irraa kufuun hawaasa keessatti faca’an jechuudha. Kanaaf, rakkoo guddaan hanqina dandeettii osoo hintaane hanqina sirnoomuu ture.

Asitti gaheen Falaasama Ida’amuu ifa ta’a. Falaasamni Ida’amuu duudhaa akka hambaa seenaa qofaatti hinilaalu; akka 𝗸𝗮𝗮𝗽𝗽𝗶𝘁𝗮𝗮𝗹𝗮 𝗾𝗮𝗿𝗼𝗼𝗺𝗶𝗻𝗮𝗮 caasaa mootummaa ammayyaa keessatti hojiirra oolchuun danda’amuutti ilaala.

Kaayyoon isaa kaleessan hidhamuu miti; dandeettii qaroominni kaleessaa uume beekuu, hawaasa keessaa sassaabuufi gara dhaabbilee mootummaa ammayyaatti jijjiiruudha.

Bu’uura hubannoo kanaatiin, Mootummaan Ida’amuu dhaabbilee seenaa akkuma dur turanitti deebisee hindhaabu. Dandeettii keessoo isaanitti kuufame adda baasee, akkaataa mootummaa ammayyaa keessatti humna isaanii ganamaa qabatanii socho’uuf isaan dandeessisuun deebisee sirneessa. Kanaaf, gaaffiin Mootummaan Ida’amuu “𝙙𝙪𝙪𝙙𝙝𝙖𝙖𝙣 𝙠𝙚𝙚𝙣𝙮𝙖 𝙢𝙖𝙖𝙡 𝙩𝙪𝙧𝙚?” kan jedhu osoo hintaane, “𝗱𝗮𝗻𝗱𝗲𝗲𝘁𝘁𝗶𝗶 𝗾𝗮𝗿𝗼𝗼𝗺𝗶𝗻𝗻𝗶 𝗸𝗲𝗲𝗻𝘆𝗮 𝘂𝘂𝗺𝗲 𝗺𝗼𝗼𝘁𝘂𝗺𝗺𝗮𝗮 𝗮𝗺𝗺𝗮𝘆𝘆𝗮𝗮 𝗸𝗲𝗲𝘀𝘀𝗮𝘁𝘁𝗶 𝗮𝗸𝗸𝗮𝗺𝗶𝘁𝘁𝗶 𝗴𝗮𝗿𝗮 𝗵𝘂𝗺𝗻𝗮 𝗼𝗼𝗺𝗶𝘀𝗵𝘁𝘂𝗺𝗺𝗮𝗮𝘁𝘁𝗶 𝗷𝗶𝗷𝗷𝗶𝗶𝗿𝗮𝗺𝘂𝘂 𝗱𝗮𝗻𝗱𝗮’𝗮?” kan jedhuudha.

𝗜𝗜𝗜. 𝗛𝘂𝗺𝗻𝗼𝗼𝘁𝗮 𝗪𝗮𝗹𝗼𝗼: 𝗞𝗮𝗮𝗽𝗽𝗶𝘁𝗮𝗮𝗹𝗮 𝗤𝗮𝗿𝗼𝗼𝗺𝗶𝗻𝗮𝗮 𝗚𝗮𝗿𝗮 𝗗𝗵𝗮𝗮𝗯𝗯𝗶𝗹𝗲𝗲 𝗛𝗮𝘄𝗮𝗮𝘀-𝗠𝗼𝗼𝘁𝘂𝗺𝗺𝗮𝗮𝘁𝘁𝗶

Deebiin gaaffii armaan olii ifa: Dhaabbilee 𝗛𝘂𝗺𝗻𝗼𝗼𝘁𝗮 𝗪𝗮𝗹𝗼𝗼 kan jedhuudha. Humnoota Waloo jechuun kaappitaala qaroominaa gara dhaabbilee hawaas-mootummaa ammayyaatti jijjiiramaniidha.

Kanaaf, kaayyoon isaanii duudhaa Oromummaa yaadachuu ykn tiksuu qofa miti; akkuma dur turetti deebisanii dhaabuus miti.

Kaappitaala qaroominichaa qorachuu, kaappitaala hawaasaa inni uume adda baasuu, caasaa sirnaa isaa beekuu, akkasumas gara dhaabbata mootummaa ammayyaa hojii qabatamaa raawwachuu danda’utti ceesisuudha.

Kun garaagarummaa bu’uuraa qaba. Sirni hawaasaa tokko seenaa keessatti bu’a qabeessa ta’uun qofti mootummaa ammayyaaf gahaa hinta’u.

Har’a hojiirra ooluuf aangoo, itti-gaafatamummaa, sirna hoggansaafi bu’aa irraa eegamu haala mootummaa ammayyaa madaaluun deebisanii ijaaruun barbaachisaadha. Kanaaf, sirna aadaa maqaaf mootummaa keessa galchuu miti; haala dandeettii hawaasummaa qabu hojiirra oolchuuf isa dandeessisuun gara dhaabbata mootummaa ammayyaatti jijjiiruudha.

Mootummaan Naannoo Oromiyaa gahee seenaafi haala qabaataa har’aa bu’uureffachuun Humnoota Walootiif qajeeltowwan bu’uuraa shan kaa’era.

 Duudhaa Oromummaatti deebi’uu;
 Halkaniifi guyyaa hojjechuu;
 Waan hundaan dorgomaa ta’uu;
 Qulqullummaa;
 Tumsa.
Hanga ammaatti Humnoota Waloo qaroomina Oromoo keessaa dhaabbilee afur sirnoomsee hojiirra oolchuu jalqabeera.
 Tajaajila Lammummaa — itti-gaafatamummaa hawaasaa gara humna hojii walootiitti qindeessuuf.
 Mana Murtii Aadaa — duudhaa haqa hawaasaa gara sirna haqaafi araara ammayyaatti ceesisuuf.
 Buusaa Gonofaa — sirna wal-deeggarsa hawaasaa gara humna damdamannaa, nageenya hawaasummaafi dorgomtummaa egereetti jijjiiruuf.
 Gaachana Sirnaa — duudhaa nageenya hawaasummaa gara humna eegumsa sirnaafi nageenya walootti qindeessuuf.
Dhaabbileen kunneen hojii adda addaa hojjetanillee, bu’uurri isaanii tokko. Hundumtuu kaappitaala qaroominaa humna hawaasaa qofa ta’ee akka hinhafne taasisu. Kanaaf, duudhaa Oromumaatti deebi’uu ykn aadaa tiksuu qofa miti; gara humna mootummaafi hawaasaa wal-cimsuutti jijjiiruudha.

𝗜𝗩. 𝗧𝗮𝗷𝗮𝗮𝗷𝗶𝗹𝗮 𝗟𝗮𝗺𝗺𝘂𝗺𝗺𝗮𝗮: 𝗛𝘂𝗺𝗻𝗮 𝗪𝗮𝗹𝗼𝗼 𝗚𝗮𝗿𝗮 𝗗𝗮𝗻𝗱𝗲𝗲𝘁𝘁𝗶𝗶 𝗚𝗼𝗰𝗵𝘂𝘂𝘁𝘁𝗶

Tajaajilli Lammummaa Humnoota Waloo keessaa isa bu’uuraati. Sababni isaas hojiin isaa inni jalqabaa qabeenya uumuu miti; dandeettii qabeenya uumuu danda’u sirneessuudha. Qabeenya uumuu dura humna qabeenya uumu ijaaruun bu’uura misoomaa ta’uudha.

Hawaasni tokko qabeenya umamaa waan qabaachuuf qofa badhaadhina hinmirkaneessu. Beekumsa qabaachuu qoftis gahaa miti; baay’inni ummataallee ofumaan humna misoomaa hinta’u. Dandeettiin hawaasaa yemmuu qindaa’u, kaayyoo waloo jalatti socho’a; dandeettii gochuu walootti jijjiirama. Kanarraa kan ka’e, Tajaajilli Lammummaa qabeenya qofa osoo hintaane, dandeettii qabeenyi ittiin uumamu ijaara.

Garaagarummaan tola ooltummaa waliin qabus asirraatti ifa ta’a. Tola ooltummaan hojii gaarii uuma; Tajaajilli Lammummaa ammoo dandeettii hojii waloo itti fufiinsa qabu ijaara. Tola ooltummaan fedhii dhuunfaa irratti hundaa’a; Tajaajilli Lammummaa ammoo fedhii gaarii hawaasaa gara humna waloo qindaa’eetti ceesisa. Ija kanaan, bu’aan isaa hojii qeenxee xumuruu qofa miti; dandeettii hawaasaa itti fufiinsaan hojii waloo raawwachuu danda’u ijaaruudha.

Falaasamni Ida’amuu gara hojii mootummaaatti akkamitti akka hiikamu asitti caalatti ifa ta’a. Tajaajilli Lammummaa mootummaa bakka bu’ee hinhojjetu. Humna mootummaaafi hawaasaa walitti ida’ee gara hojii walootiitti qindeessa. Kunis, gahee mootummaa hawaasa irratti fe’uu miti; humna mootummaafi hawaasaa wal-cimsuun hojii oolaanaa waliin raawwachuu danda’u ijaaruudha.
Kanaaf, bu’aan Tajaajila Lammummaa hojii guyyaa tokkoon hinmadaalamu.

Dandeettii hawaasaa fulla’iinsan ijaaruun madaalama. Dandeettiin hawaasaa yemmuu cimu wal-amantaan nicima; wal-amantaan yemmuu cimu qindoominni nicima; qindoominni yemmuu cimu dandeettiin gochuu gara dandeettii oomishtummaatti jijjiirama. Tajaajilli Lammummaa humna namaa walitti qabuu qofa miti; humna waloo ijaaruudha.

𝗩. 𝗥𝗮𝗴𝗮𝗮 𝗤𝗮𝗯𝗮𝘁𝗮𝗺𝗮𝗮: 𝗗𝗮𝗻𝗱𝗲𝗲𝘁𝘁𝗶𝗶 𝗛𝗮𝘄𝗮𝗮𝘀𝗮𝗮 𝗛𝘂𝗺𝗻𝗮 𝗢𝗼𝗺𝗶𝘀𝗵𝘁𝘂𝗺𝗺𝗮𝗮𝘁𝘁𝗶 𝗖𝗲’𝗲

Yaanni Tajaajila Lammummaa yaada siyaasaa qofa osoo hintaane, qabatamaan hojii keessatti qoramee kan mirkanaa’eedha. Gaaffii “𝗱𝗮𝗻𝗱𝗲𝗲𝘁𝘁𝗶𝗶𝗻 𝗵𝗮𝘄𝗮𝗮𝘀𝗮𝗮 𝘀𝗶𝗿𝗻𝗮𝗮𝗻 𝘆𝗼𝗼 𝗾𝗶𝗻𝗱𝗮𝗮’𝗲, 𝗴𝗮𝗿𝗮 𝗱𝗮𝗻𝗱𝗲𝗲𝘁𝘁𝗶𝗶 𝗼𝗼𝗺𝗶𝘀𝗵𝘁𝘂𝗺𝗺𝗮𝗮𝘁𝘁𝗶 𝗷𝗶𝗷𝗷𝗶𝗶𝗿𝗮𝗺𝘂𝘂 𝗱𝗮𝗻𝗱𝗮’𝗮𝗮?” jedhu hojii waggoota muraasa keessatti raawwateen ifatti deebiseera.

Bara 2012 hojiilee muraasaan kan jalqabe Tajaajilli Lammummaa, yeroo gabaabaa keessatti gara sochii hawaasa guutuu hirmaachisuu danda’utti guddateera.

Hirmaannaa hawaasaafi mootummaa walitti qindaa’een hojiileen damee garaagaraa keessatti raawwataman bu’aa dinagdee guddaa uumaniiru. Hanga bara 2018’tti hojiilee gosa 72 keessatti raawwatamaniin bu’aan tilmaamaan 𝗕𝗶𝗿𝗿𝗶𝗶 𝗧𝗶𝗿𝗶𝗹𝗶𝘆𝗼𝗼𝗻𝗮 𝟭.𝟭 𝗼𝗹𝗶𝘁𝘁𝗶 shallagamu uumameera

Bu’aan kun dameewwan akka eegumsa qabeenya umamaa (misooma sululaa, ashaaraa magariisaa), barnoota (ijaarsa manneen barnoota Bu’uura Boruu, sadarkaa 1ffaa, daree dabalataa, manneen dubbisaa, paarkilee dijitaalaafi manneen jireenya barsiisotaa; kibaabilee wabii, istandaardomsuufi mijatummaa eeguu); ijaarsaalee bu’uuraalee misoomaa, bishaan dhugaatiifi tajaajila hawaasummaa keessatti galmaa’eera.

Garuu hiikni lakkoofsa kanaa qarshii qofaan hinmadaalamu. Hiikni isaa inni guddaan humni hawaasa keessatti faca’ee ture gara humna qindaa’ee hojjetuutti jijjiiramuu isaati. Kuni mootummaa qofatu misooma hojjetaa ture jechuu miti; hawaasni mootummaa waliin ta’ee misooma ijaaruu akka danda’u agarsiisa. Kana jechuun, dandeettiin hawaasaa gara dandeettii hawaas-mootummaatti ce’uu jalqabe jechuudha.

Kanaaf, bu’aan Tajaajila Lammummaa bu’uuraalee misoomaa ijaaraman qofa miti; 𝗱𝗮𝗻𝗱𝗲𝗲𝘁𝘁𝗶𝗶 𝗯𝘂’𝘂𝘂𝗿𝗮𝗮𝗹𝗲𝗲 𝗺𝗶𝘀𝗼𝗼𝗺𝗮𝗮 𝘆𝗲𝗿𝗼𝗼 𝗯𝗮𝗿𝗯𝗮𝗮𝗰𝗵𝗶𝘀𝘂𝘁𝘁𝗶 𝘂𝘂𝗺𝘂𝘂 𝗱𝗮𝗻𝗱𝗮’𝘂 𝗶𝗷𝗮𝗮𝗿𝘂𝘂 𝗶𝘀𝗮𝗮𝘁𝗶. Mana barnootaa ijaaruun bu’aa tokko; hawaasni mana barumsaa ofii ijaaruu danda’uun dandeettiidha. Sulula misoomsuun bu’aa tokko; hawaasni qabeenya umamaa ofii tikfachuu danda’uun dandeettiidha. Bu’uurri misoomaa ijaarame bu’aa tokko; hawaasni bu’uura misoomaa ofii ijaaruu danda’uun dandeettiidha. Kunis mootummaaafi hawaasa gidduutti hariiroon hojii haaraa akka ijaaramu muldhisa.

Kunis bu’aa hojii tokkoo caalaa jijjiirama caasaa agarsiisa. Yemmuu humni hawaasaa dhaabbataan qindaa’u, hojiileen mootummaa qofaan raawwatamuu hindandeenye qindoomina hawaas-mootummaan raawwatamuu jalqabu.

Tajaajilli Lammummaa qabeenya qofa hinuumu; 𝗱𝗮𝗻𝗱𝗲𝗲𝘁𝘁𝗶𝗶 𝗾𝗮𝗯𝗲𝗲𝗻𝘆𝗮 𝗶𝘁𝘁𝗶 𝗳𝘂𝗳𝗶𝗶𝗻𝘀𝗮𝗮𝗻 𝘂𝘂𝗺𝘂𝘂 𝗱𝗮𝗻𝗱𝗮’𝘂 𝗶𝗷𝗮𝗮𝗿𝗮. Kanaaf, milkaa’inni isaa hojii baay’ee raawwachuun qofa hinmadaalamu. Hawaasa rakkoo isaatiif furmaata alaa eeggurraa gara hawaasa furmaata ofii uumutti ceesisuu danda’uun madaalama.

Asirratti hiikni dandeettii oomishtummaa kan baramee ol ta’ee muldhata. Dandeettiin oomishtummaa damee tokko qofarraa hinmaddu.

Humni hawaasaa yemmuu walsimu, walitti qindaa’ufi kaayyoo waloo jalatti hiriiruu danda’u, oomishtummaan damee hundatti babaldhata; ammoo wal-baay’isa. Kanaaf, Tajaajilli Lammummaa kaappitaala hawaasummaa haaraa uuma; kaappitaalli hawaasummaa sun yeroo dheeraa keessatti gara kaappitaala dinagdeefi badhaadhina waaraatti jijjiirama.

𝗩𝗜. 𝗠𝗼𝗼𝘁𝘂𝗺𝗺𝗮𝗮 𝗜𝗱𝗮’𝗮𝗺𝘂𝘂: 𝗞𝗮𝗮𝗽𝗽𝗶𝘁𝗮𝗮𝗹𝗮 𝗤𝗮𝗿𝗼𝗼𝗺𝗶𝗻𝗮𝗮 𝗚𝗮𝗿𝗮 𝗕𝗮𝗱𝗵𝗮𝗮𝗱𝗵𝗶𝗻𝗮𝗮𝘁𝘁𝗶

Yaadonni hanga ammaa kaafne hubannoo “mootummaan dandeettii hawaasaa hin’uumu; nisirneessa” jedhu cimsu. Sirni Gadaa kaappitaala qaroominaa uuma. Humnoonni Waloo kaappitaala sana gara dhaabbilee mootummaa ammayyaatti jijjiiru. Tajaajila Lammummaa yoo fudhanne dandeettii hawaasaa gara humna oomishtummaatti jijjiira. Hiikni isaanii guutummaatti kan wal-simu asitti.

Gaheen Mootummaa Ida’amuu bu’uura kanaan ilaalama. Mootummaan misooma mara ofiin hinhojjetu; dandeettii hawaasaa qindeessee gara hojii humna walootti jijjiira. Bu’uuruma kanaan, humna hawaasa keessatti faca’ee jiru gara humna hawaas-mootummaa qindaa’eetti ceesisuun, dandeettii oomishtummaa guddisuu keessatti gaheen Mootummaa Ida’amuu bakka bu’aa hinqabu.

Qabeenyi guddaan ummata Oromoo lafa, bishaan ykn albuuda qofa miti; kaappitaala qaroominaa hawaasa keessatti kuufameedha. Kanaaf, imalli keenya gara seenaatti deebi’uun duudhaa faarsuu miti; gara humna misoomaa, sirna omishaafi mala jireenya har’aatti meelchuudha.

Dimshaashumatti, Sirni Gadaa kaappitaala qaroominaa uume. Falaasamni Ida’amuu kaappitaala sana adda baasuuf agartuu ta’e. Mootummaan Ida’amuu sirnummaa itti hore. Humnoonni Waloo bifa dhaabbata mootummaa ammayyaa qabsiisan.

Tajaajilli Lammummaa dandeettii hawaas-mootummaa uume.

Dandeettiin oomishtummaa badhaadhina waaraa mirkaneessa.
Mootummaan humna hawaasaa hinuumu; kaappitaala qaroominaa adda baasa, sirneessa; gara dandeettii oomishtummaatti jijjiira.

Kunis imala Mootummaa Ida’amuuti.