Hariiroo Itiyoophiyaa fi Keeniyaa Nageenyaa fi Misooma Naannawichaa Cimsuuf Gahee Olaanaa Qabu

Finfinnee, Onkoloolessa 10, 2019 (FMC) — Itiyoophiyaa fi Keeniyaan biyyoota ollaa hariiroo seenaa, siyaasaa fi dinagdee yeroo dheeraa qabaniidha.

Hariiroon tarsiimawaa waliigalaa Itiyoophiyaa fi Keeniyaa, waliigaltee daangaa seenaa qabeessa ta’e irraa eegalee hanga har’aatti, Afrikaa Bahaa keessatti michummaa seenaa qabeessaa fi faayidaa waloo irratti hundaa’uun tumsa dippilomaasii taasifamaa jiran keessaa isa tokko ta’ee ibsama.

Hariiroon biyyoota lamaan gidduu jiru waggoota dheeraa kan lakkoofsise yoo ta’u, yeroo gara yeroottis hariiroon hoggantootaa fi ummataa gara ummataatti qaban addaan hin cinne cimee itti fufeera.

Biyyoonni lamaan walitti hidhamiinsa dinagdee isaanii guddisuu fi daldala isaanii babal’isuuf yeroo yerootti hojjechaa jiru.

Akkasumas, walitti dhufeenya hawaasummaa fi aadaa lammiilee biyyoota lamaan gidduu jiru cimsuuf xiyyeeffannoon addaa kennameera.

Ciminni hariiroo Itiyoophiyaa fi Keeniyaa nageenyaa fi tasgabbii Gaanfa Afrikaaf gumaacha olaanaa qaba.

Hariiroon waliigalaa Itiyoophiyaa fi Keeniyaa kabajaa fi faayidaa waloo irratti kan hundaa’e qofa osoo hin taane, bilisummaa fi tokkummaa ardichaa guddisuuf bu’uura cimaa kan kaa’e, fakkeenya Paan-Afrikaanizimii ta’eera.

Biyyoonni lamaan hariiroo isaanii fi faayidaa biyyaalessaa isaanii eegsisuun dinagdee, saayinsii fi teeknooloojii, dhimma hawaasummaa akkasumas nageenya naannawaa irratti waliin hojjechaa jiru.

Fuuldurattis hariiroo ummataa fi ummataa biyyoota lamaan gidduu jiru sadarkaa caalu irraan ga’uuf waliin hojjechuu isaanii cimsanii itti fufaniiru.

Ministirri Muummee Dooktar Abiy Ahimad ayyaana biyyaalessaa Guyyaa Mashujaa (Guyyaa Goototaa) magaalaa Eldooreetitti kabajame irratti argamuun haasawa taasisaniiru.

Ministirri Muummee Dooktar Abiy Ahimad haasawa isaaniin gootota bilisummaa biyya isaaniitiif qabsa’anii fi birmaddummaa isaanii kabachiisuuf aarsaa guddaa kaffalaniif kabaja guddaa qaban ibsaniiru.

Gootonni kunniin gumaacha isaan taasisanii fi ashaaraa isaan dhaalchisanii darbaniifis beekamtii olaanaa kennaniiru.

Seenaa gootummaa fi aarsaa Keeniyaa, seenaa Adawaa Itiyoophiyaa, yeroo lammiileen Itiyoophiyaa kutaalee biyyattii garaagaraa irraa walitti dhufuun biyya isaanii ittisuuf tokkummaan dhaabbatan waliin baay’ee kan wal fakkaatu ta’uu kaasaniiru.

Lammiileen biyyoota lamaan naannoo daangaa jiraatan aadaa, afaan, daldala, qonnaa fi tuurizimii irratti hariiroo isaanii cimsuun nageenyaa fi tasgabbii naannichaaf gahee olaanaa qaba.

Hariiroo ummataa gara ummataatti fi walitti hidhamiinsa dinagdee biyyoota lamaan gidduu jiru caalaatti cimsuu fi haala mijeessuuf ijaarsi bu’uuraalee misoomaa daangaa ce’anii gahee murteessaa qaba.

Hariiroon biyyoota lamaan gidduu jiru nageenya naannichaa cimsuu, akkasumas walitti bu’iinsa daangaa ce’uun yeroo yerootti uumamanii fi furmaata isaanii irratti gahee guddaa qabaata.

Biyyoonni lamaan dameewwan daldalaa, invastimantii, nageenyaa fi tasgabbii irratti tumsa isaanii cimsanii itti fufaniiru.

#Ethiopia #BiyyaGuddoo #UmmataGuddaa #MullataGuddaa