የትግራይ ህዝብ አዲስ የተስፋ ብርሃን

አዲስ አበባ፣ ጥቅምት 11፣ 2019 (ኤፍ ኤም ሲ) በታሪክ እጣፈንታቸው ተሳስረው፣ በደስታውም ሆነ በችግር ጊዜ በትብብር በማለፍ ጠንካራ የህዝብ ለህዝብ ግንኙነት የገነቡት የኢትዮጵያ ብሔሮች፣ ብሔረሰቦችና ህዝቦች ለዘመናት አብረው ኖረዋል።

ሆኖም ይህን የጠበቀ ወንድማማችነት እና ሀገራዊ አንድነት ለመሸርሸር፣ ህገወጡ የህወሓት ቡድን በመንግሥት ስልጣን ላይ በነበረበት ረጅም ጊዜያት ውስጥ የቂምና የቁርሾ ትርክቶችን በመንዛት የህዝቦችን ግንኙነት ሲያሻክር መቆየቱ የቅርብ ጊዜ ትዝታ ነው።

ቡድኑ ሀገርን እና ህዝብን በሚጠቅሙ አበይት ጉዳዮች ላይ ትኩረት ከማድረግ ይልቅ፣ በዘረፋ፣ እና በከፋፋይ ፖሊሲዎቹ ተጠምዶ ሀገሪቱን ለከፍተኛ የኢኮኖሚ እና የማህበራዊ ውድቀት ዳርጎ አልፏል።

ከህዝባዊ እምቢተኝነትና ተቃውሞ በኋላ ቡድኑ ከነበረበት የፌደራል ስልጣን ሲወገድ ስህተቱን አርሞ ወደ ሰላማዊ መንገድ ከመመለስ ይልቅ የጥፋት ጉዞውን ቀጥሏል፡፡

በተለይም የትግራይን ህዝብ ከቀሪው የኢትዮጵያ ወንድም ህዝብ ለመለየት፣ ለማግለል እና የጥርጣሬ ግንብ ለመገንባት በርካታ እኩይ ተግባራትን ሲሸርብ ቆይቷል።

የቡድኑ ዋና ዓላማ የትግራይ ህዝብ ደህንነት፣ እድገት ወይም ሰላም ሳይሆን ለዓመታት ያከማቸውን ያልተገባ ሀብትና የግል የስልጣን ፍላጎቱን ማስጠበቅ ብቻ እንደነበር በተግባር አሳይቷል።

እንዲሁም የሀገርን ሉዓላዊነት እና የህዝብን ሰላም ለማስጠበቅ የቆመውን የፌደራል መንግሥት በተለይም የሀገር መከላከያ ሠራዊት ላይ በይፋ ጥቃት በመክፈት ጦርነት አወጀ።

በዚህም ስግብግብነቱ ሰፊውን የትግራይ ህዝብ ለአላስፈላጊ እልቂት፣ መከራ እና ስደት ዳርጎታል።

መንግሥት ለሰላም አማራጮች የነበረውን ቁርጠኝነት ያሳየበት የፕሪቶሪያው ስምምነት ህዝቡ ዳግም ሰላምና ልማትን እንዲያገኝ ያለመ ነበር፡፡

ነገር ግን ይህ የጥፋት ስብስብ ስምምነቱን በማፍረስ ዳግም ህዝቡን ለእልቂት ማዘጋጀቱን ተያያዘው፡፡

ይህ አጋጣሚ ቡድኑ ከትግራይ ህዝብ ጋር ምንም አይነት እውነተኛ የህልውናም ሆነ የዓላማ ትስስር እንደሌለው፣ ይልቁንም ህዝቡን ለራሱ የፖለቲካ ቁማር መጫወቻና ከለላ ያደረገው መሆኑን ቁልጭ አድርጎ ያሳየ ታሪካዊ ክስተት ነበር።

ሆኖም የፌደራል መንግሥት ሀገርን የማዳን እና የህግ ማስከበር ህገ መንግሥታዊ ግዴታውን ተወጥቶ በወሰደው የተቀናጀ ርምጃ ይህ ህገወጥ ቡድን ፍጹም ሽንፈትን እንዲከናነብ ሆኗል።

የቡድኑ መሸነፍ ለሀገሪቱ ሰላም መመለስ ብቻ ሳይሆን፤ ለረጅም ጊዜያት በስጋት፣ በውጥረት እና በጭቆና ቀንበር ስር የነበረውን የትግራይ ህዝብ ሙሉ በሙሉ ነጻ ያወጣ አጋጣሚ ሆኗል።

ህዝቡ ከቡድኑ እገታ እና የፖለቲካ ጫና በመላቀቅ የራሱን እድል በራሱ የመወሰን እና ወደ ሰላማዊ ህይወቱ የመመለስ እድል አግኝቷል።

ዛሬ በክልሉ በተመለሰው አስተማማኝ ሰላም ምክንያት የትግራይ ህዝብ ከፍተኛ ደስታውን እና የተሰማውን እፎይታ በአደባባይ በመግለጽ ላይ ይገኛል።

በአሁኑ ወቅት በክልሉ በጥፋት ቡድኑ ሴራ የወደሙ መሰረተ ልማቶችን መልሶ ከመገንባት ባሻገር አዲስ የልማት፣ የኢኮኖሚ ህዳሴ እና የብልጽግና ጉዞ ተጀምሯል።

በክልሉ አዲስ የተስፋ፣ የልማት እና የሰላም ጉዞ የተጀመረ ሲሆን፤ የነገዋ ኢትዮጵያም በህዝቦቿ የጋራ ትጋት፣ አንድነት እና እኩልነት ላይ ተመስርታ ወደ ላቀ ከፍታ ለመሸጋገር በመንገድ ላይ ትገኛለች።

#ኢትዮጵያ #ትልቅሀገር #ትልቅሕዝብ #ታላቅርዕይ

በመልካም ፈቃዱ